Twavay 2:12-33

¹²Yo té sipwi tèlman yo pa té sav ki sa pou yo té kwè. Yonn mandé lòt, “Ki sa sa vlé di?”

¹³Mé lézòt ki té la pwan yo sèvi widitjil, yo di, “Sé nonm sala ja bwè twòp diven, yo sou!”

¹⁴Lè sala Pita doubout épi lézòt wonz zapòt-la épi i palé byen fò pou tout sé moun-an tann. I di yo, “Zòt ki Jwif épi tout lézòt moun ki ka wèsté an Jérouzalèm, kouté byen épi mwen kay diʼw sa sé bagay sala vlé di.

¹⁵Sé moun sala pa sou kon ou ka kwè, paski sé névè bonmaten i yé.

¹⁶Bondyé té ja palé bay pwòfèt Jowèl konsèné sa. I di:

¹⁷‘Mi sa mwen kay fè an dènyé tan-an: Mwen kay voyé Lèspwi mwen asou tout lézòm. Fiʼw épi gasonʼw kay palé pawòl mwen, épi sé jenn nonm ou-an kay wè vizyon, épi sé gwan nonm ou-an kay wévé wèv.

¹⁸An sé jou sala mwen kay voyé Lèspwi mwen asou sèvant mwen, nonm kon fanm, épi yo kay palé pawòl mwen.

¹⁹Mwen kay fè tout kalité miwak, ni an syèl-la ni asou latè-a. La kay ni san, difé épi gwo lafimen épé.

²⁰Sòlèy-la kay vini menm kon nwèsè, épi lalin-an kay vini wouj menm kon san, avan gwan épi bèl jou-a lè Senyè-a kay witounen.

²¹Lè sala Bondyé kay sové népòt moun ki kay kwiyé asouʼy.’

²²“Jan Izwayèl, kouté byen sa mwen ka di zòt la-a! Zòt konnèt byen sé Bondyé menm ki té voyé Jézi nonm Nazawèt-la paski zòt ja wè sé miwak-la épi sé gwan twavay-la Bondyé té ba li pouvwa pouʼy fè-a. Zòt konnèt sa byen paski sé isi-a menm anpami zòt i fèʼy.

²³I té ja an plan Bondyé épi i té ja konnèt an davans yo té kay ladjé Jézi anba lanmen zòt, épi zòt té tjwéʼy lè zòt ladjéʼy bay mové nonm pou kwisifyéʼy.

²⁴Mé Bondyé fèʼy wésisité épi i délivwéʼy hòd lanmò-a, paski i té enposib pou pouvwa lanmò té tjenbéʼy.

²⁵Lè Wa David té ka palé asou Jézi, i di: ‘Mwen té ka wè Bondyé Senyè-a douvan mwen tout lè. I toujou pwé mwen, kon sa anyen pa kay sa twakasé mwen.

²⁶Sé pou sa tjè mwen kontan, épi lè mwen ka palé, mwen ka palé épi lajwa, épi mwen menm, menm si mwen sé san èk lachè, mwen ka èspéyé èk konfyans an sa Bondyé kay fè ban mwen.

²⁷Ou pa kay kité lam mwen koté sé mò-a yé-a, épi ou pa kay kité kò sèvant-lan ki ka viv baʼw tousèl-la pouwi an twou-a.

²⁸Ou ja moutwé mwen chimen-an ki ka ban mwen lavi-a, épi mwen kay ni tjè kontan, paski ou toujou la épi mwen.’ ”

²⁹Pita kontiné ka palé, i di, “Fwè mwen, kité mwen fèʼw konpwann sa byen asou Wa David, gwan gwanpapa lontan nou. I mò épi fòs-la koté yo téwéʼy-la isi-a jis jòdi-a.

³⁰I sété an pwòfèt épi i té sav sa Bondyé té ja pwonmèt li. Bondyé fè sèman épi i di, ‘Menm kon ou sé an wa, mwen kay fè yonn an sé désandanʼw-lan vini an wa tou.’

³¹David té wè sa Bondyé té kay fè an tan ki kay vini épi i té palé asou wézèwèksyon Mèsaya-a, wa-a Bondyé té pwonmèt pou voyé-a, lè i té di: ‘Bondyé pa té kitéʼy koté sé mò-a yé-a, épi i pa té kité kòʼy pouwi an twou-a.’

³²Bondyé ja wésisité menm Jézi sala épi nou tout sé témwen sa.

³³Bondyé, Papaʼy, onnowéʼy lè i météʼy asid asou lanmen dwèt li épi i ba li Lèspwi Bondyé, menm kon i té ja pwonmèt. Kon sa sa ou ka wè-a épi ka tann apwézan-an sé kadoʼy i voyé anlè nou.