Aposel 2:12-33

¹²Iŋ fidian dumasa saian go ilod weiwei geig se ya, ago dugo sed nug dusumiani, “Kulob en san fun mok dugo mok ak i?”

¹³Gug aenkadi aposel adi kukok ad diganeg dubol, “Tamol en nag wain tubun mi duluk boi.”

¹⁴Ago dugo Pita aposel 11 dida dumado yak imasag, awan tubun mi awad yabig ibol, “Aŋ Juda tamolpein, agod aŋ fidian Jerusalem na amado dan, kudom agure uyanan pe, mel en fun ŋufulale dop aloŋ a.

¹⁵Tamol emaiak wain duluk abol den ta duluk na ya. Tia, gamu man 9 klok tidom lo mi a.

¹⁶Ak niŋen o kankan agane. Abaŋ e ale den wagam profet Joel igo ibol:

¹⁷“Anut ibol, ‘Saen wadan ipalu wo sumeik dop, ŋai ŋaineg Urgun tamolpein fidian sad tinid fo ŋuwali idup diŋane wa. Nanuk tamol ak, iŋ nanuk pein ak dam profet ru dubol ilasa wa. Aŋanem pinein foudi ak malad ŋutun dile wa. Aŋanem tamol busumadi ak ŋioŋ lo ŋioŋamin diŋane wa.

¹⁸Saen an lo dop ŋaisag urat pein, urat tamol dam, tinid fo ŋaineg Ur ŋuwali idup diŋane wa. An lo dop iŋ dam profet ru dubol ilasa wa.

¹⁹Ŋai keit lo kulob girager naon sensen ŋigane wan ŋukubiai ale wa. Ago dop tan na dam kulob tutubun sensen ak kob igo woŋ ŋigane dop ale wa. An man dar, yai, agod yaikas malan bilkas nuŋon ak ilasa wa.

²⁰Ad iŋsan naon ibilisap tidom oŋ ilasa dop, kalam dam malan ibilisap, daran pe dar oŋ ilasa dugup, Tubun en san nal tubun ak girager anda idu wa.

²¹Ago dop tamolpein ensauta a gadiŋ lo Tubun en ibinawai o duwagiŋ dan, iŋ tamolpein an fidian patud ipasi wa.’

²²“O Isrel tamolpein, kudom agure! Anut aŋ naom na ikubiaig ale yak, iŋ Nasaret tamol Jesus an uyan ipani a. An dugo woŋ i? Anut sen kulob girager agod urat dababai funfun kob igo woŋ tamol an lo idiri dugo ale na ya. Melmel an aŋ luluŋam lo tamol an tuon lo dilasa dugo aŋ an fidian aloŋ a.

²³Wagam mok Anut iloŋ uyanan ak, Jesus aŋ banim lo yau a. Aŋsem tamol saiadi ak dida atumanaig aŋ iŋsad binawek da Jesus aigim fo abali a. An aŋ mitep ago agane wo yan Anut wagam mi iloŋ uyanan a, man dugo, iŋ ilon nek ago yen a.

²⁴Gug mateŋ Jesus yabituani san tia tag Anut iŋ ifufunig, fon kumaen imasag mateŋ san madai tuon lo ipasi a.

²⁵Wagam mi Dawid sen dam Jesus niŋen o igo ibol, ‘Tubun ak pempem mi ŋai naog na itur da, an ŋai ŋile da. Iŋ ŋai siŋireg na imado dugo dabai ipanag dan lo, tamolpein ŋai dimiriranag san tia ya.

²⁶Ak niŋen o ŋai ilog tubun mi uyan dugo ŋai awag, ru ilo uyan san ibol ilasa da. Ŋai tinig dam oŋ binawag an mala nouk lo mi ititiano imado da.

²⁷Man dugo, oŋ ŋaisag ŋutug Ades lo biseip ante ta yen na wa. Oŋ oŋane Tamol Gun ak ulefuni dop ta igan na wa.

²⁸Oŋ ŋai kumaen san dal kubiai panag a. Oŋ ŋai da tumado wak lo ŋai uyasusai dam panag pe tinig iŋanefute wa.’”

²⁹“O teig muroug, aŋ aloŋ ak ru e ŋurupaiaŋ den ru rumok, id tubud baged Dawid imat go disare ya. Agod iŋsan mutou yen dan pempem tile da.

³⁰Gug Dawid man profet ta. An niŋen o iŋ iloŋ ak, Anut ru lak na geig nam promis ipani an lo, mitep iŋsan malan kubulan ta kiŋ iganep, iŋsan aben iŋane wa.

³¹Anut mitep dugo igane wan Dawid iloŋ tag, Kristus mitep fon kumaen imasa wak niŋen o ibol. Fun an lo dam ibol, Anut Kristus Ades lo ibiseig ta imado na ya, ago dugo tinin dam ta igan na ya.

³²Anut Tubun ak Jesus nek amaiak mateŋ lo ifufunig, kumaen imasa da ya. Agod mel an maŋ fidian sema malama lo mile ya.

³³Anut Jesus iŋaneg yaŋan tubun geig anda giraŋen won ak lo imado da. Anut gubak mi iŋanen Awan Urgun Jesus ipani wo promis ru ipani a. Aria, gamu promis an nuŋon ilasag Urgun iŋane ya. Ago dugo Jesus sen Urgun an maŋ tinima fo iwali idu ya, ago dugo aŋ mel en ale dugo kududom iloŋ a.