APOSEL 2:12-33

¹²Yake asatnake nangaakan natake anzing yaking, “E mate! Sanga wa tasike yakaing kakngae yapii dasing natapnangge,” ngang yaking.

¹³Siwan ngana aminu kunduta yanisapduke anzing yaking, “A! Aminu aakwakga yangga toknga takngatu tangoke datdap takaing,” ngang yaking.

¹⁴Siwan ngana aposel aminu katau kuut musaat gatu kepianganu tapatuatda unekan gatake yuke Pitata dandam tangan yuke wa apbing aminu wamu apaa anzing yanikut, “Mate! Judia amin! Jerusalem yuaing aminu kuupbam daniwa natapnong!

¹⁵Ginu ninde natake yangga takngatu tangoke datdap takaing ngang ma niniwam. Yangga toknga aknga tangoke dua datdap takamang. Wena. Dasingge? Ninu apmaau tembana yuamang. Aminu tembana yangga toknga dua tangokaing ngangu atnataamang.

¹⁶Siwan aminu Anutue wam yanikapbuu tapatu umana Joel ngang iniking. Waapata sanga apmanu akaamang kakngae natake tupa siknga Anutue wamu anzing matakut,

¹⁷‘Anututa anzing yawan kakum. Tapduknga wengane anzing tasiwit. Nata Waunga ginu kuupbamde damit. Dama waakzaat yapasaatda sanga apmea sining kaknga anggaman natake yanikapning. Siwan wawi kekeknga aminda mia takngatu takngatu akaning. Siwan aminuake gwa siya aminu kuutda mia akaning.

¹⁸Siakan! Tapduu apmea siwik gwekatang natane puya amina maya wawi kuutde natane Waunga ayamit. Yama apmea sining kaknga anggaman natake yanikapning.

¹⁹Siwan nata duya takngatu takngatu banakan pasiwa katap mumuyangga isiwawan kupanda enane kowawan kuutda akaning. Kawawa kepdakane duya kekeknga takngatu takngatu pasiwit. Pasiwawa dakga epuwawan kuutda kake Anututa kekeknga siknga yuak ngang natapning.

²⁰Natapa gunzitda zikaa siwan yekapda gamana dak binga siwan kaning. Siwan tapduknga na gindane kuyasata dua apit gwene sanga waaknga akaning.

²¹Kake kumnam ngang natake akgwauke nae nanindatapningu waiakngana sandeyama takekan yutning. Wamu waaknga Anututa yawan natapbum,’ ngang Joelda unzing matakut.

²²“Siwan mate! Isrel nana amin! Daniwa natapnong! Anututa Jesu Nasaret nanaapa kekekangaman duya takngatu takngatu pasike puya kekeknga pasikut. Unzing pasike gin banakan katang pasiwawan ginda kaisata kake Anututa initewan apu pasinggak ngangu ginda anggamanu gwakaking.

²³Siwan Anututa wamu tupa yakut taknga tawake apmaau aminu kunduta Jesu take kaitakapu ginde damuking. Dama Jesu ginda take tangutningge yawa kekekawan wai aminda Jesu tapmangga amin saamdakane tanguwa kumbut.

²⁴Kumbut ngana gatu gweawikge kepi umutnanga dua siwan Anututa akumbut katangga gatu tangenakut.

²⁵Siwan tupa siknga Devitda Anutue wamu takngatu natake anzing matakut, ‘Nata kawawa Kuyanata asinggan asinggan naat gatake yuamak. Yuwatda meya takngatu nae apanu asandekngamik.

²⁶Unzing na toikgakge banipmaatang tatanga nataat. Natake kumzang inimbaknganggat. Sike na akumnanga amin dakngake yuat ngana kungwake gatu asenawit ngang natapa siakan singgak.

²⁷Nata akupanu gata na dua napmake kuwawi wena gatukande dua siwit. Na gatane waakgata yuwa gata nae apbakngake gatangami natane gupmata dua bukatawik ngang natapa siakan singgak.

²⁸Gata yeukngami nata kayuk yuwitde kepi aknga gwa kakum. Kawa gaat naat unekan gatake yuwatda banipma tatanga siknga siwik,’ ngang natake Devitda matakut.

²⁹“Siwan mate notnabam. Deviu wamu waaknga matakut takngae anggaman daniwa natapnong. Bamindane take apanata yusikanga kupan kwaiking. Siwan akwaiking komu andang yuwawan asinggan kaamang.

³⁰Siwan Deviu Anutue wam natake yanikapbuu waapata yusika Anututa wamu takngatu iniwan kekekakut takngae natapbut. Natapan anzing inikut, ‘Apmea nata yawa gatane zakngi tapatuta enake Isrel amindane takeapa dakngake yuwik,’ ngang iniwan kekekakut.

³¹Iniwan kekekawan Anututa apmea sanga waaknga tasiwik ngang Devitda natapan kekekakut. Natapan kekekawan apmea apik kapata apu kungwake gatu gweawik kakngae natake Devitda wamu takngatu anzing matakut, ‘Akumbut ngana ie gatukande dua bitake kuwawan yuke gupnata dua bukatakut,’ ngang matakut.

³²Siwan Jesu waapata kupana Anututa gatu tangenawan ninda kaininda kana siakan sikut. Siwan ninu waakngae yanike yuamang.

³³Siwan tangenake Jesue umana buyambam siwikge Anututa yawan umana kayaapa dakngake Anututane kataknga siya apane yuak. Yuwawan Anututa apmea anzing tasiwit ngang tupa yawan kekekakut taknga gwa tasikut. Tasike Waung Takwana Jesue tengamukut. Siwan apmanu nata wamnane wamnane daniwa ginu kake nataaing kakngatane yepii unin. Jesuta Waung Takwana niman banipmikatang pukuke papan tasina ninduaing.