Tuwalali 13:32-42

³²Ama wasa waiwaisana ha wasaan eliyamiu i ola hiwe: bateli toto Yehoba i bateli tubulau elal,

³³he iyaka i ginol kila tubutubuniliyau kaiwela, kaiwena iyaka Yeisu i pamasal ge i palutem yaomala. He i ola Same labuina ana baaba, Yehoba i ba: ‘Owa natu; lan ebe ya awa natunagiwa.’

³⁴Yehoba Yeisu ni palutem yaomala yaka tuwana nige ni bwebweyan, he bana te i ba: ‘Tunahot mulolu bwabwalena elana na muloluagimiu, ni ola ya bateli Deibid elana.’

³⁵Ge Buki Bwabwalena puna etega al i ba: ‘Nige nu tatalam wam totuwalali bwabwalena tuwana ni bwebweyan.’

³⁶He Deibid i ba i ola o, nige totona bana i oola, kaiwena iya wana sauga elana Yehoba wana nuwatu i ginol yaka abwe i yaomal. Tuwana hi teliek salaiya alonau tubunau ge i bweyan.

³⁷Yaa tau toto Yehoba i palutem yaomala tuwana nige i bwebweyan.

³⁸Taliwau ge nuwau, nuwau nuku atena bubun Yeisu eliyana i bosowaina Yehoba wami gegi ni nuwayoho, inoke ha papaatena-an eliyamiu i ola to. Mosese wana Logugui nige bosowaina ni sokalimiu wami gegi elana, yaa henala ebo ni abulilek, Yeisu eliyana Yehoba ni sokal wana gegi elana.

⁴⁰Nuku matahikagimiu bahi palopitau wali baaba ni mamasal eliyamiu. Heliya Yehoba wana baaba hi baunan i ola hiwe:

⁴¹Totalatalawasi komiu, no ginol nuku kite, inoke nuwamiu nuku ahe, yaa abwe nuku yaomal. Kaiwena ginol enuna ya giginol wami sauga elana, ginol o nige nuku aabulilek-an, bwagana ebo nihi wasaan bubun eliyamiu.”

⁴²Pol ge Banabas iyoho hi tagitagil limi tapwalolowa, yaka gamagalau hi awanun elal nihi sikalim Sabwata i nenem ge wasa o nihi papaatena-an al elal.