Apostolo 13:32-42

³²Ma ave kap ra bo na varvai tadav avat ure ra tinata na vamading tadav ra lavur tama i dat,

³³ba God i ga pait ot pa ia tadav dat ra umana natu i diat ba i ga vatut pa mule Iesu, da di ga tumu ia bula ta ra vauruana kakailai dari: “U a Natugu, gori iau tar vangala u.”

³⁴Ma ure nam, ba di ga vatut pa ia mulai kan ra minat, ma ba pa na talil mulai tadav ra mareng, i ga tatike dari: “Ina tabar iu ma ra umana gomgom na magit i dovot kai David.”

³⁵Tago i tatike tai ta ra tika na kakailai dari: “Pa una tul tar kaum Gomgomuna upi na gire ra mareng.”

³⁶Ma David, ba i go ongo ta ra nuknuk i God ta kana taun tarai, i va mat, ma di vadiop ia pire ra lavur tamana, ma i ga mareng;

³⁷ma nina ba God i ga vatur ia, pa i ga mareng.

³⁸A tara na turagu, avat a matoto ba di varveai ta vavat ure ra punpun vue ai ra lavur varpiam ta go ra tutana;

³⁹ma ta nina iat, go diat par dia nurnur, da valangalanga diat kan ra magit parika; nina ba ra tinata na varkurai kai Moses i mama valangalanga diat kan ia.

⁴⁰Avat a balaure avat ta nam ba ra umana propet dia ga varvai tana, ba na monong avat, dari:

⁴¹“Avat a umana tena varkulumai avat a gire, ma avat a kaian, avat a panie; Tika na papalum iau pait ia ta kavava kilala, A papalum ba pa avat a kapupi ia ona tikai na ve avat i tana.”

⁴²Ba dia irop vanavana, dia ting pa ia upi na varve mule diat ta nam ra tinata ta ra Bung Sabat namur.