Turin Kiden 13:1-27

¹A ya mangurug kiden nga magaammung ta ili na Antiyoka a ya kadwan tekid ya aglavun na Namaratu nga mangiuhohug ta ibar na, a ya kadwan para ya makkamu mangituldu ta mangurug kiden. A ya ngagan da hapa a i Barnabas, ikid ni Simyon nga magngagan hapa te Niger, ikid ni Lusyo nga taga Sirene, ikid ni Manaen nga pinadakal ni Gubernador Herud, ikid ni Salu nga magngagan hapa te Pablu.

²A ta takday araw tekiden mangdayaw ta Namaratu a aweda hapa pagkakan, te intu la nonotan da ya pakimallak da. A itta hapa ya nepeuhohug na Kahalwa na Namaratu tekid. “Igungay muy ig Barnabas ikid ni Pablu, petta tarabakun da ya pangidoban ku tekid,” kunna.

³A aweda bit ninonot ya pangan da petta pakimallak da ig Barnabas ikid ni Pablu, a nesagpaw da hapa ya kamat da kiden ta ulu da, kapye da kid pinatugut.

⁴A gafu ta Kahalwa na Namaratu ya mangidob tekid a nagtugut kid la, a dimmayum kid ta ili na Selusya ta bikat na bebay, kapye da nagbapor addet ta fugu na Sipre.

⁵A tekiden dimmagut ta ili na Salamina a umange kid makigimung ta kapilya na Hudyo kiden, petta ipadangag da ya uhohug na Namaratu tekid, a intu hapa kahulun da i Hwan Markus, te uffunan na kid hapa.

⁶A sangaw nesaned da ya uhohug na Namaratu ta ngamin paglehut na fugu en addet ta ili na Pafus, a yen hapa ya nakasimmun da ta takday Hudyo nga magmadyik nga magngagan te Elimas Baresus. Te ya gubernador na fugu en nga magngagan te Sergyo Pawlu a dana pinaayagan na ig Barnabas ikid ni Pablu, petta dangagan na hapa ya uhohug na Namaratu, te mappya hapa ya nonot na. Ammi ya magmadyiken a magyan hapa ta bali na gubernadoren, te intu kan ya takday aglavun na dyos kiden, a tinabtabang na ya uhohug nig Pablu, a sinansanat na ya gubernadoren, petta awena mina kurugan ya uhohug da en.

⁹Ammi i Pablu a pake napasinapān hapa ta Kahalwa na Namaratu, a nagporay ya mata na en te Elimas.

¹⁰“Iko ya anak na Satanas, te ikatupag mu ya ngamin katunungan. Intu la amum ya magladdud ikid na manguyoyung, te awem haman magimmang mangpakillu ta dalan na Namaratu.

¹¹Ammi pa-gangan na kan, te magdaram kan, a awem sangaw maita ya dakar addet ta mabayag,” kun ni Pablu tentu. A ka-ma la nagsugiram na ya itan ni Elimas, a kamkammatan na ya pakigemidan na.

¹²A ta nepakaita na gubernadoren ta iningwa na Namaratu te Elimas a mangurug na hapa, te pake nagpaka-lat hapa ta netuldu nig Pablu gafu te Afu Hesus.

¹³A ta nekabalin da ta ili na Pafus a nagtugut ha ig Pablu ikid na kahulun na kiden, a nagbapor kid ha abat ta ili na Perga ta lugar na Pampiliya, ammi yen hapa ya nangtammangan ni Hwan Markus tekid, te magtolin ta ili na Herusalem.

¹⁴A sangaw nagtugut hapa ig Pablu ikid ni Barnabas ta ili na Perga, te magdulot kid na ta takday na Antiyoka ta lugar na Pisidya. A ta Sabadu a umange kid makigimung ta kapilya na Hudyo kiden, a nagtuttud kid,

¹⁵te dangagan da bit ya mangibasa ta surat ni mina Moses ikid na surat na kadwan kiden aglavun na Namaratu. A ta kabalin na pangibasa na a itta ya dinob na pinakadakal kiden ta ange mangibar teg Pablu ta maguhohug kid hapa. “Mappya, kahkahulun, ta magbida kam hapa am itta ya ibar muy ta tolay kidin,” kunna.

¹⁶A nagtayuk mantu i Pablu, kapye na nagsenyas tekid, petta dangagan da ya ibar na. “Ikamuy nga Istralita, ikid na ikamuy Hentil nga mamat ta Namaratu ewan, a dangagan muy ya mabidak tekamuy.

¹⁷Dana amu muy haman ya iningwa na Dafu tamewan Namaratu ta palungu na araw, te pinili na ya gingginafu tam kiden, petta tolay na kid. A tekiden nagyan ta lugar na Egipto a pake pinakaddu na kid. A sangaw pina-gang na hapa ya nagpatagabu kiden tekid ta pakapangwa na en, petta patugutan da ya tolay na kiden nga pagzigātan da. A sangaw netugut na kid hapa ta lugar na Egipto,

¹⁸a inifunan na kid ta kalafukanen addet ta appatafulu na darun.

¹⁹A sangaw inuffunan na kid nga mangabak ta pitu na nasyon ta lugar na Kanaan, kapye na neatad ya lugarin yen tekid, petta kwa da. A kumanen nagpasan ya appatagatut a limafulu na darun addet ta neange na dadagkal da kiden ta lugar na Egipto.

²⁰“A ta kabalinan na a pinili na Namaratu ya tagtakday manaron tekid addet te Samwel, a intu hapa ya napolu en aglavun na Namaratu tekid.

²¹A tentu en naglaklakay a nagadang ya tolay kiden ta ari da, a pinili na Namaratu i Salu nga anak ni Kis, a simsima hapa ni mina Bendyamin. A i Salu mantu ya ari da abat ta appatafulu na darun.

²²A ta nepangawe na Namaratu te Salu a pinili na i mina Dabiden, petta intu ya ari da, te ya uhohug na Namaratu tekid a ‘Intu la megitta ta nonot ku i Dabid nga anak ni Dyesi, te kurugan na sangaw ya ngamin patarabakuk tentu,’ kunna.

²³“A ya simsima kiden hapa ni mina Dabiden ya nagafun na Mangikerutanen nga nekari na Namaratu tekitam, te intu hala i Hesus.

²⁴Ammi dana imunnan bit tentu i mina Hwanen, te nepadangag na ta magbabawi mina ya ngamin tolay nga Istralita ta liwat da kiden, kapye na kid zigutan.

²⁵A ta tanagay pagaddetan na tarabaku ni Hwan a dana nepadangag na ya ange na Mangikerutan ta tolay kiden. ‘Iyak hud ya Mangikerutan nga doban na Namaratu tekamuy, am awa pumatalin hala sangaw teyak. A pake atata-nang ammi teyak, te awek haman megitta nga makitagabu tentu,’ kunna.

²⁶“A yen mina ya nonotan tam, kahkahulun,” kun ni Pablu, “te ikitam nga simsima ni mina Abraham, ikid na ikamuy Hentil nga mamat ta Namaratu, a ikitam haman ya nangipakamun na Namaratu te Hesusen nga mangikerutan tekitam.

²⁷Te ya tolay kiden ta ili na Herusalem ikid na pinakadakal da kiden a aweda haman amu ta intu ya Mangikerutan nga nekari na Namaratu tekitam, te pinapasi da haman. Ammi aweda haman amu ta dana nalavun ya pasi na ta surat na nanglavun kiden, te maski am kanayun basan da ya surat da kiden ta kada Sabadu a aweda haman manonot ta ikid ya nangidulot ta dana nalavun ta surat kiden.