Godigo Sęba Tagala Palai Bidigo Po 13:1-27

¹Te Antiok bulude, te Jisasgo po wali pabo bidi tomode, te Godigo po pusa mabo bidi profetgo pusubo po tiwai po wabo tiwai bidi me badu te bulude bidali, te Godigo po te we bidi augwaliba ola mabo bidi dabe me badu me bidali. Te bidi dabe augwaligo nogi me Barnabas, me Simeon, agai nogi me Husugo Bidi, me bidi Lusius, agai page bulu Sairini, me bidi Manain, te moni gavman bidi Herot aga age, tama me bidi nogi Sol.

²Tama augwaligo tubo nai osogo gisilama, Godibolo nage dwagi yai da obadi, tama Godigo Dwagi Yai Mobo Bidigo augwalibolo te po wai, “Te Barnabas dali, Sol dali si te tedali sę emainu tedali muao, te eno dąį ilali sę augwali sigo emai yaibao,” wali.

³Tama te po odama, augwaligo nai ma osogo tagalama, God dali po olama, augwa nogo tega si toboluba mubadi, augwali sigo te yabo tedali sęde sa muani. Tama tilama, tega si te sęba tagala palali.

⁴Te Godigo Dwagi Yai Mobo Bidigo te Barnabas dali, Sol dali si tagala palama, augwali si te Selusia buluba pali. Tama Selusiade moni gebadu pelama, tama te tamu ąį bolama te Saiprus tǫ sabolali, te ąįgo u badu te e badu si bologobea sai tomo yagu tǫba sabolali.

⁵Tama tede te be nani Salamis sabolama, augwali sigo te Juda dabego bomo yai po ola mabo be dabede Godigo po pusa mawai. Te bidi Jon, agai nogi me Mak, agai me tega si tau selama, te sę yali.

⁶Te nosali augwaligo te Salamis bulu taga pelama, gasa habu badu, bulu me nogi Pafos, teba sabolali. Tama augwaligo te bulude Juda bidi me deli suali, agai nogi Barjisas. Te bidi agai dwai pobi dabe wabo bidi, tama agai tigidali we bidibolo tibo po ola mayu, “Ena Godigo po pusubo bidi dao,” wali.

⁷Tama te bidi aga abagi te moni gavman bidi Sergius, aga nogi me Paulus, aga abagi dao. Tama Sergius, aga nogi me Paulus, agai te Saiprus bulu tǫde bidibo we bidi tigidali agai tonalubo da. Aga haniani kolesaga koneai bidi da. Tama te moni gavman bidigo Barnabas dali Sol si i olama, “Asao,” wali, agai homugo ‘Augwali sigo Godigo po enabolo ola mabo po odaio,’ te homu yai.

⁸Tiali goli, te dwai pobi dabe wabo bidi Barjisas, te Grik pogo aga nogi Elimas, agai homugo ‘Moni gavman bidigo Godigo po wali pidali weyu,’ te homu elama, tega sigo wali po sela sąyani, te agai po ugwaba mu sali.

⁹Te yali, te Sol agai nogi me Pol, agai gedugo te pobi wabo bidi bomonama tonaluali. Tama Godigo Dwagi Yai Mobo Bidi aga homude pągąnaluali.

¹⁰Pol agai te po wai, “Nage da, te Satango ogwa dao. Te nago tigidali dwagi yai kolesaga boi bidi homu ąǫ, te ebe yabao. Nage dwai dwai kolesaga elama, tibo po wabo bidi me dao. Nago te Genuai Bidigo dwagi yai tų mu dolobao. Nago te tibo kolesaga tagalabo homu meniwe?

¹¹Tama Genuai Bidigo nogogo nage geduba elaibao. Nago gedu hulia selama, giliga ge osogo sugobeo,” Polgo te po wai. Tama polo te hano tiwai te bidi Elimas aga gedude halua selama, hulia si elaluali. Aga nogo dali sągą dali sigo naga tų gege pali. Agai homugo ‘Dego ena nogo tolama, tų ola magowe?’ te homu elama, bidi gegali.

¹²Tama te moni gavman bidigo te ebo sę sulama, agai homu tigidali Jisasba muani. Aga noma mu sali, te Genuai Bidigo sę dabe augwali sigo aga ola mobaso tama noma sali.

¹³Te nosali Pol dali aga dali bidali bidi dabe augwaligo moni geba selama, Pafos bulu tagalama, tama tamu ąį daidu pelama tama augwali Perga be naniba sabolali, te Pamfilia tǫde. Tiali goli, Jon aga nogi me Mak, agai tede te bage tagalama, aga Jerusalemba ma geasa pali.

¹⁴Tama augwali Perga be nani tagalama, augwali pelama, Antiok be naniba sabolali, te gasa me tedali Antiok, te Pisidia tǫde. Tama te Juda dabego Sabat sogo augwali te Juda dabego bomo yai po ola mabo be tomoba pelama, augwali dugayali.

¹⁵Tama bidi mego Mosesgo bomo yai po asęani buku nedama, tama nosali bidi mego Godigo polobadu po pusa mani profet bidigo asęani buku me nedama, tama te tobolu bidi dabego Pol dali Barnabas sibolo po ola tolali. Augwaligo augwalibolo te po wai, “Ama dede, dagego dwagi yai po me elalubaso da, teda da we bidibolo dage sigo megi da ola maiąo,” te po wai.

¹⁶Tama Pol hodaluama, agai “Dagego odao,” olama, nogo muani. Agai te po wai, “Eno homugo dage Israel bidi me, dage Israel isąwai bidi hani me, tiali goli dagego Godibolo po mu wabo dao, dagego bugagia olo munama, eno po odao.

¹⁷Da Israel we bidi dago God, agai dago wąį dabe polobadu dąį ilali. Tama augwali te Isip tǫde bobobage sogo bidibadi, Godigo augwali te genuai hani mu nigilali. Tama God agai bomogo augwali te Isip tǫ taga solama,

¹⁸te kemi tǫ bidi meni yai bulude bilidubadi, kibu be bidi sigo nogo sągą sese te 40 yia silama yali. Tama te kibu be tomode bidibadi, augwaligo dwai kolesaga ebo sęgę Godigo selama, agai tonaluali.

¹⁹Tama Godigo te Kenan tǫde bidali hani a nogo olama, me badu nogo si wagi solama bidai bidi hani ela silali. Tama ela silama, Godigo te tǫ te Israel hanibolo mani.”

²⁰“Te augwali te tǫde bidama, te kibu be hauwa mu te 450 yia silali. Tama te silama, nosali Godigo te Israel hani dabe augwalibolo po tų dodolobo bidi dabe mawai. Tama me isibaso, hasegeleyu, hasegeleyu, tama ela pali. Tama bida bida pelama, te bidi Samuel dią holali sogo sabaligi pali, te Godigo po pusa mabo profet bidi.

²¹Tama te sogo augwaligo Godibolo hanalu wali, ‘Da gegasa pabo bidi, moni genuai gavman bidi dabolo mao,’ wali. Tama God agai te bidi Kis aga ogwa Sol te sa muani. Te bidi agai hani nogi Benjamin. Agai augwaligo moni genuai gavman bidi nigilama, tama bidali. Te sę eyu bidibadi, kibu be te 40 yia silali.

²²Tama tilama, Godigo Sol hasegelama, Devit te moni genuai gavman bidi nigilama bidali. Tama Godigo te po Devitde wai, ‘Megi eno te bidi Devit sualio, te bidi Jesigo ogwa, eno agade dwagi yai homu ebao. Nosali eno sę tigidali agai yaibao,’ Godigo te po wai.

²³Tama Jisas, te Devitgo nosali hani bidi, te bidi Godigo selama, da Israel dabe tau sabo bidi nigilali, Godigo polobadu wali po tiwai.

²⁴Tama Jisas agai yali sę gagalisąbadi, Jon agai te Israel we bidi tigidalibolo te po wai, ‘Dagego dwai kolesaga ebo tagalama, homu begelama, eno dage baptais mawaibao,’ wali.

²⁵Tama Jon agai sę silabo maga ebadi, agai te we bidibolo te po wai, ‘Dagego homugo ena de dawe?’ wali. ‘Ena te dagego tonalubo bidi menio. Tiali goli, dagego odao. Bidi me deli nosali aga ena tudi badu asaibao. Aga da, te genuai bidi mu da. Ena da nogi elalubo bidi menio. Eno agai sągą nadoba bono pisigabo sę yainogo ebaso da, teda te sę ebo eno usu egobeo,’ Jongo te po wai.”

²⁶Te bidi Polgo te po olama, po me ola mani, “Ama dede, abe dede, dage Abrahamgo hani bidi dagego me, odao. Dage Juda bidi hani isąwai bidi, dage God wali pabo dao, dagego me odao. Godigo agai da ma dobola sabo tų nigali po te da tigidalibolo tagala palali.

²⁷Tama te Jerusalemde bidibo we bidi me, augwaligo tobolu bidi dabe me, augwaligo te bidi Jisas agai yali sę page konebe, agai wali po page me augwaligo konebe. Augwaligo te Godigo po polobadu pusa mani bidi profet dabego wali po tigidali Sabat sogode odama, tama augwaligo te po page bugagia konebe. Tiali goli, augwaligo homugo Jisas elaibao homu e baso, polobadu Godigo po pusubo profet bidi dabego wali po megi nai gilama mu walalio.