Tjaanakuṉu 21:8-19

⁸Nganampa puuta mantangka yila ngarangi. Nganaṉa puuta kutu katingi mantangka ngaratjunkunytjaku. Niitingi palunya nganaṉa puutatjarrangku puulamilara katiyanangi ngaṉṯiwana mantakutu.

⁹Mantangka nganaṉa tjarukatirra waru nyangu, kampanyingka. Piitji tjuṯa warungka kampangi. Mangarriṯarra yila ngarringi.

¹⁰Yiitjulu nganaṉanya watjaṉu, “Piitji kuka aapa niitingingka mantjiraya ngalya kati!, ngalkunytjaku.”

¹¹Palulanguru Tjaaman Piitalu puutangka kaḻparra niitingi palunya puulamilara katingi mantakutu. Piitji kuka tjuṯalingku ngarringi, yantaṯan pipitiyi tjirripala. Niitingi paluru nguwanpa yarralytjarringu, kuka tjuṯalingkutjarra. Wiya niitingi paluru kuka tjuṯatjarra yarralytjarringupaka, wiya.

¹²Yiitjulu nganaṉanya watjaṉu, “Ngalya yarraya ngalkunytjaku!” Nganaṉa uwankarrangku kuliṉingi, “Yilta, palatja Yiitjunya ngaranyi, mayutju nganampa.”

¹³Yiitjulu mangarri piitjiṯarra mantjira katirra nganaṉanya yungu ngalkunytjaku.

¹⁴Yalatji Yiitjunya mirritjanu pakara yutirringu nganaṉala. Paluru yurrunpa nganaṉala waaḻangka kutjarrangara yutitjarringu, palumpa kutunguḻu tjuṯangka, mirringuru pakara.

¹⁵Mangarri kukaṯarra nganaṉa ngalkura wiyara Yiitjululpi Tjaaman Piitanya tjapiṉu yalatji, “Piita, Tjaanaku katja. Ngaa tjuṯaya ngayuku yunytju nyinanyi. Tjinguru nyuntu ngaa tjuṯangka wirriḻi ngayuku puntura yunytju nyinanyi, yilta?” Paluru Yiitjunya watjaṉu, “Yuwa mayutju, nyuntu kuliṉi ngayulu nyuntupa yunytju nyinanyi.” Yiitjulu watjaṉu, “Ngayuku walytja tjuṯa tjananya yaṉṯayaṉṯara nintinma!, tjiipi wiima tjuṯa nguwanpa.”

¹⁶Yiitjulu Piitanya piyuku tjapiṉu, “Piita, Tjaanaku katja. Tjinguru nyuntu ngayuku puntura yunytju nyinanyi, yilta?” Paluru Yiitjunya watjaṉu, “Yuwa mayutju, nyuntu kuliṉi ngayulu nyuntupa yunytju nyinanyi.” Yiitjulu watjaṉu, “Ngayuku walytja tjuṯa tjananya yaṉṯayaṉṯara nintinma!, tjiipi tjuṯa nguwanpa.”

¹⁷Yiitjulu Piitanya piyuku tjapiṉu, “Piita, Tjaanaku katja. Tjinguru nyuntu ngayuku puntura yunytju nyinanyi, yilta?” Piitanya watjilarringu, Yiitjulu tjirripalangara wangka palunya tjapiṉutjangka. Piitalu palunya watjaṉu, “Mayutju nyuntu yuwankarraku ninti nyinanyi, wangka yalatjiṯarra nyuntu kuliṉi, ngayulu ilta nyuntupa yunytju nyinanyi.” Yiitjulu palunya watjaṉu, “Ngayuku walytja tjuṯa tjananya yaṉṯayaṉṯara nintinma!, tjiipi tjuṯa nguwanpa.”

¹⁸Paluru Piitanya piyuku watjaṉu, “Wangka ngaatjanya kulila! Nyuntu yangupala nyinarra walytjangku kulira ngurra kutjupa tjuṯawana yankupayi. Ngula nyuntu tjiḻpirrinytjala yaṉangu kutjupangku mara ruupatjarrangkunta tayimapira katiku ngurra kutjupakutu. Ngurra palumpa nyuntu yunytjuwiya nyinaku.”

¹⁹Yalatji Yiitjulu Piitanya watjaṉu nganaṉa yalatji kulintjaku, “Piitanya wiya walytja mirrirriku, kutjupangku palunya katirra yiluntanku. Yalatji paluru mirrirringutjangka yaṉangu tjuṯangku Katutjanya waḻkulku Piitanya kutu tjukarurru Katutjaku nyinangutjangka.” Yiitjulu Piitanya piyuku watjaṉu, “Ngayuku walytja nyuntu kutu tjukarurru nyinama!”