Zon 21:8-19

⁸Be tagataga takadi nge kati-o be ika raka-lo dikauri nge dirape be Pita ditagai. Tago kasau-tina ka dipoatipoati. Masa kaleti ngaua-lo nge ‘90 mita’ bokana ka dipoatipoati.

⁹Ditoka nge manggeta tekedi dikarakara be dita. Manggeta ngaedia-lo nge ika be ‘bereti’ dieno.

¹⁰Kodeka Iesus bokai iradi, “Ika kaituka-tina kadoki alu kamadokimai.”

¹¹Iesus bokai ipile nge Saimon Pita dang-lo itaolako be raka kabu-lo irepekaoro. Ika nge biabia-biabia rube ka didoki, moarunga. Moimoi ika kokoko-tina didoki, ata raka tago imasare.

¹²Kodeka Iesus bokai iradi, “Kamamai be kamamoanako!” Ata tagataga tago teke itegi, “Kaiko naita?” Di dikaua nge Tanepoa ka makara isoaki.

¹³Kodeka Iesus ilako be ‘bereti’ be ika idoki be iandi.

¹⁴Mate-lo be imarang muri nge, nge bong tolia ka tagataga ne ipurakadi.

¹⁵Dimoanako-doi nge Iesus itaguraki be Saimon Pita bokai itegi, “Saimon, Zon natu, kaiko moimoi be kurereretaka be reretaka nem ngaedi nge tamoata ngaedi reretaka nedi diuasadi ki tago?” Be Pita ikatu be bokai pile, “E, Tanepoa! Kaiko kukaua ngau urereretakiko!” Kodeka Iesus bokai ipile, “‘Sipisipi’ natu negu goakokolangdi!”

¹⁶Be Iesus kaba bong ruaia itegi, “Saimon, Zon natu, kaiko moimoi be kurereretaka?” Be Pita ikatu be bokai ipile, “E, Tanepoa! Kaiko kukaua ngau urereretakiko!” Be Iesus bokai irai, “‘Sipisipi’ negu goarogurogudi!”

¹⁷Kodeka Iesus kaba bong tolia itegi, “Saimon, Zon natu, kurereretaka ki tago?” Makara nge Pita ilo ibuku-tina, bakara, nge ambe bong tolia ka itegi, “Kurereretaka ki tago?” Bokaibe Pita bokai irai, “Tanepoa, kaiko kana moarunga kukauataki. Kaiko kukaua ngau urereretakiko!” Be Iesus bokai irai, “‘Sipisipi’ negu goakokolangdi!

¹⁸Moimoi ka uraiko. Isi amunangam-lo nge nem-la be kusi nem kuokoko be rerengam-lo inanga golako kana nge golako-ba. Ata ambe kukamoangbia masa lumam gonanaraki be tamoata takaia lumam ngauau be tago rerengam-lo ngabagaikolako.”

¹⁹Iesus bokai ipile nge Pita mate bakarairai ngamate be ono Nanaranga ara atabala-tina nganangai kana ka bokai ipile. Kodeka Iesus Pita bokai irai, “Gotagaia!”