Tinavete 28:13-30

¹³Meke sipu topue gami vasina, si la hogoto pa keke vasileana nomana, pozana Reqiamu. Meke sipu hola keke rane si raza sa gevasa, ke pa koivugona si la hogoto si gami pa Putioli.

¹⁴Vasina si la tutuvi gami sari kaiqa turaṉamami koe Karisito, meke tepa gami rini pude koa keke vuiki paki koa rini, meke tiqe ene hola la pa Roma si gami.

¹⁵Na avosoni gami rina tie te Karisito pa Roma sapu korapa la si gami, ke mae si arini pude dogoro gami. Kaiqa arini si mae tutuvu gami koasa vasileana tana maketi pa Apiasi, meke kaiqa arini si mae tutuvu gami koasa vasileana vasina koa sari ka ṉeta vetu kamoana tadi na tie enenedi. Sipu dogori e Paula si arini, si vahesia sa sa Tamasa, meke koa tava ṉiṉira si asa.

¹⁶Meke sipu la kamo gami pa Roma si tava malumu se Paula pude koa eke telena, meke ta kopue mo si asa koa ke solodia.

¹⁷Sipu hola ka ṉeta rane, si tioko varigara ni e Paula sari na koimata tadi na tie Ziu pa Roma, meke zamai sa si arini, “Gamu kasa na tie Ziu turaṉaqu, loketoṉa si evaṉia rau pude ṉoṉovali sari na tie Ziu turaṉada, babe va kari sari na hahanana tadi na tiatamada pu ta kopue vari tetei mae pukerane, ba ta pusi hoboro mo si rau pa Zerusalema, meke ta vala pa limadi rina tie Roma.

¹⁸Sipu beto nanasau rina tie Roma, si hiva vata rupahau rini si rau, sina dogoria rini sapu lopu evaṉia rau si keke sinea, sapu pada pude tava mate nia rau.

¹⁹Ba sipu lopu va egoa rina tie Ziu sapu gua asa, si ta zukuru si rau pude tepa pude ta pitu koasa baṉara pa Roma, ba lopu sapu ari qua ginugua pude zutu i sari na tie Ziu turaṉaqu.

²⁰Asa ginuana sapu tiokoni gamu rau, pude qu vivinei koa gamu, gua. Sina koa gua koasa tie sapu rovea na aqa nia sa butubutu Izireli, si ta pusi nia seni rau hie,” gua si asa.

²¹Meke zama si arini, “Lopu hite vagia gami si keke leta mae gua pa Ziudia koasa guguamu goi. Meke kaiqa mami tie pu mae guadi vasina, ba lopu hite mae tozini gami tugo si kaiqa inavoso kaleadi pa ginuamu goi.

²²Ba kote hiva avosi gami sari na mua binalabala, sina pa doduru vasina si gilania gami sapu kana ia rina tie sa linotu pu somana nia goi sana,” gua si arini.

²³Gua asa, ke variva toṉoto nia rini koe Paula si keke rane; meke sipu kamo sa rane asa, si moatana sa vinarigara tinoni pu mae vasina koa se Paula. Podalae munumunu meke kamoa boṉi si vivinei va bakala nia Paula koa rini sa inavosona sa Butubutu Baṉara te Tamasa, meke podekia sa pude va hinokaria rini se Zisu. Ke vizata vagi meke zama luli ni sa sari na Kinubekubere Hope pu koa pa Tinarae te Mosese, meke tadi na poropita koasa guguana e Zisu.

²⁴Kaiqa arini si va hinokari sari nana zinama, ba kaiqa si lopu va hinokara.

²⁵Gua asa ke vari tokei teledia si arini meke sipu taluarae si arini, si zama nia e Paula sapu guahe: “Hinokara sapu gua zama nia sa Maqomaqo Hope koasa poropita Aisea koari na tiatamamia pukerane!

²⁶Ura zama guahe si Asa: ‘La mamu tozi ni sari na tinoni hire: Kaqu avosia, na avosia mo gamu, ba lopu kaqu gilania; meke kaqu dogoria, na dogoria mo gamu, ba lopu kaqu gilania.

²⁷Ura lopu hiva va avoso sari na taliṉa dia, meke ele va puta i rini sari na matadia, meke korodia va avoso sari na bulodi rina tie hire. Be lopu gua, si kote boka dodogorae mo sari na matadia, meke avavosae mo sari na taliṉa dia, meke kote boka gilagilana mo sari na bulodia, meke kote boka kekere mae mo koa Rau, meke kaqu salaṉi Rau si arini,’ gua sa Tamasa.”

²⁸Meke pa vinabetona, si zama guahe se Paula, “Mi gilania si hie, sapu sa inavosona sa tinaharupu te Tamasa, si ta garunu la koari na Zenitailo. Arini si kote va avoso!” gua si asa.

³⁰Meke koa karua vuaheni se Paula koasa vetu sapu tabaria sa pude koa ia, meke vasina si va kamoi sa sari doduru tie pu mae hopiki nia si asa.