Te Israel Tobolu Bidi Dabe 18:7-24

⁷Tama tialima, te a naga bidi dabego te bulu tagalama, tama augwali pelama, te hanu Laisba sabolali. Augwali pelama suali, te bidi dabe bugagia bidaluali, te Saidon bidi dabe tiwai bugagia bidali. Augwali te dua digi bugagia mu bidali, tama augwaligo te gasa bidiba wado po me wasiąwai. Tama augwaligo hwįabo homu me isiąwai. Augwali te nai me deli me sǫą pabeo. Tama augwaligo te gasa hani bage dali te bisnis sę me isiąwai. Tama augwali te Saidon dabe pąde me bidibeo.

⁸Te a naga bidigo te bulu susa bilama, tama augwali te bulu Sora me Estaolba ma geasa pabo si, tama augwa deli hanigo augwaliba hanalu wali, “Dage pelama, te magi nai naga sualiwe?”

⁹Tama augwaligo te e tama tiwai po wali, “Te dage asesa polo asama, tama dago augwali dali hwįnao. Dago te tǫ wiegi yai mu suali. Dage olo me bidilamuo. Asesa dao! Dago te augwaligo tǫ sigi paibao.

¹⁰Te dage pabo sogo da, te augwali bugagia bidiyu, tama augwaligo hwįabo homu me elalubo sugubeo. Te tǫ genuai tama, te augwali magi nai me deli me sǫą pabeo. Odiąo, te Godigo da tau selama, tama dago augwali aiyaba elaluaibao,” wali.

¹¹Tama tialima, te Dango hani bidi dabe te 600 ami bidi te hanu Sora me Estaol tagalama, tama augwali hwįgi painu sisi yai.

¹²Augwali pelama, tama te bidabo pesage te Kiriat Jearim te Juda tǫ pedai badu nigali. Tama te bulu nogi augwaligo te Dango Nigali Pesage wabo te nogi megi me elalubao. Tama te nigali pesage te giliga degasa dulubo badu te bulu Kiriat Jearimde elaluai.

¹³Tialima, augwaligo te bulu taga peyu, tama te bidi Maikago beba sabolali, te Efraimgo bulu bage bulude elaluai.

¹⁴Tama te a naga bidi te Lais dabego hanu tǫba sa pelama suali bidi dabego te augwa deli hanibolo te tiwai po wali, “Te badu te be me delide te tibo god me deli augwaligo te nigo nigilama, tama augwaligo te silvago haluama elaluali. Dagego te koneaniwe, ma meniwe? Tama te tibo god meba u mabo elalu, te pris dabego holobo ugwa me elalubao. Megi da te dago magi yaibawe?” te a naga bidi dabego te po wai.

¹⁵Tialima, augwaligo te sunumi tagalama, tama te Maikago beba pelama, tama augwaligo te Livai gesi ogwa bidi bidibo suali. Augwaligo agabolo te siade da po weyu, te po wali, “Nage bugagia bidibawe?”

¹⁶Tama te Dango ami bidi te 600 bidi te hanu bagulali obo te pabo sunumi dolalu, te augwaligo hwįabo sisi elalu bidali.

¹⁷Te bulu sa geme pelama sugi pali te a naga bidi dabe augwali te be tomoba pelama, te tibo god dabe sigi pali. Tama te pris te 600 ami bidi dabe dali te hanuba pabo sunumide bidali.

¹⁸Te bidi te Maikago be tomoba pelama, tama augwaligo te tibo god dabe sali, tama te prisgo augwaliba hanalu wali, “Dagego magi ebawe?”

¹⁹Tama augwaligo agaba po waliyu, “Nago pedauwali pania sao,” wali. “Nago po me olamuo. Tama nage da dali asao, te nage pris bididu, tama nage te dabolo homu konebo kolesaga ola mabo bidi bidagameo. Te nage te Israel hani tigidaligo pris bidi bidibaso, te wiegi yai yaibao. Te deli hani sibigo pris naga bidibo te dwai dao,” wali.

²⁰Pris te pode wiegi yai homu pemene elama, tama agai te tibo god dabe selama, te augwali dali palio.

²¹Tialima, tigidali bidi ma geasa pali. Tama te wai dabe me, te bulmakau dabe me, te doado bage me, te augwali polasa pali.

²²Te Dan dabego te Maikago be taga peyu, te digibulu pai madi, tama Maikago te aga pąde bidali bidi dabeba i waliyu, te augwali wali pobeasa pelama, te augwali dali hwįgi pao wai. Augwaligo te Dango hani dabe pobeasa peyu, wali pelama, te nosali augwaligo augwali suali.

²³Tama Maikago hanigo te Dango haniba i olama, hae wai. Tialima, te Dango hani dabe begelama, te Maikabolo wali, “Magi sę yaliwe? Magi baso nage te genuai hani bidi dali asaliwe?”

²⁴Tialima agai te po wai, “Dagego eno pris bidi me te eno nigali tibo god dabe selama, te dage wi soalio. Te eno doado bage deli te me munalubeo. Magi baso te dagego enabolo ‘Magi sę yaliwe?’ po hanalu obawe?”