Sua Tutŋana 28:14-27

¹⁴Tomtom ta so imototo Anutu mi mataana iŋgalŋgal itunu, nako leleene ambai mi kampeŋana ki Anutu imbotmbot se kini. Mi tomtom ta so ŋgar kini imbolmbol se pa mbulu ki zooroŋana, na ni ko indeeŋe pataŋana.

¹⁵Sombe tomtom sananŋana sa ikamam peeze mi ikototo zin wal sorrokŋan, ina ni kembei laion ta kalŋaana izalla, o bea ta ilonloondo ma ila be ikan tomtom.

¹⁶Biibi sa isombe ikototo sorok zin wal ta timbot la ni kopo mbarmaana, ina iswe i kembei ŋgar kini ipet zen. Mi sombe biibi sa iurur koi pa mbulu ki watkeŋana, na ni ko imbot ambai su toono ma molo.

¹⁷Tomtom ta so ipun tomtom toro ma imeete, na kaimer ko irao mbuleene su kat na som. Ko imototo mi leleene ipata pa mbulu kini tana ma irao meeteŋana kini. Mi ko irao ikam le gaabaŋana sa be ipomboli na som.

¹⁸Tomtom ta so ipa pai kini ma ambai men, nako Anutu itatke i pa pataŋana kini. Mi tomtom ta so ipaŋobŋoobo pa zaala ambaiŋana, nako molo som to imeete ma isula lene Andewa.

¹⁹Tomtom ta so ikamam uraata pa toono kini, nako irao kat pa ka kini. Mi zin wal ta tilala pa koroŋ soroksorok ta ŋonon somŋan i, nako tisu ma timbot ŋoobo kat.

²⁰Tomtom ta so izzo sua ŋonoono men mi itoto sua kini mbukŋana, nako indeeŋe kampeŋana biibi. Mi zin wal ta gorgori tirru zaala pakaamŋana sa be karau men mi tindou len koroŋ boozo, na Anutu ko irao ileele zin na som. Zin kola tire kadoono pa mbulu kizin.

²¹Sombe iti lende uraata be tiurpe pataŋana kizin tomtom, mi talae kizin wal pakan, ina mbulu ambai som. Bela takam mbulu raraate men pizin wal ta boozomen. Tamen zin bibip pakan ta titirtiiri sua i, sombe tomtom tikam len koroŋ rimen ŋonoono, nako tilae kizin mi tiuulu zin pa sua kizin.

²²Zin wal ta matan konŋan na, tirru zaala be karau men mi tindou len koroŋ boozo. Mi tikilaala som. Zaala ta titoto na, kaimer ko ikam zin ma tisu ma timbot ŋoobo.

²³Nu sombe yaamba tomtom sa bekena pazali, na kaimer ni ko leleene ambai pu ma ilip pizin wal ta kwon imbesmbeeze pini sorok na.

²⁴Tomtom ta so ikam kuumbu pa tamaana ma naana, mana kaimer isu mi iso: “Nio aŋkam ŋoobo mbulu sa som.” Na ni kembei igabgaaba zin wal ta tikamam zigzik na.

²⁵Zin wal ta matan koroŋŋan na, tipasansaana tomtom lelen, mi tikamam ma ŋoŋi iwedet. Mi tomtom ta so ipase pa Yooba, nako imbot ambai mi itum kat.

²⁶Tomtom ta so ipase pa itunu, na ikankaana kat. Mi tomtom ta so itoto zaala ki ŋgar ambaiŋana, na pataŋana sa ko irao ipasaana kati na som.

²⁷Tomtom ta so irairai koroŋ kini pakan pizin wal sorrokŋan, nako irao iru zalaana pa koroŋ sa som. Mi tomtom ta so irre zin men, mi iuluulu zin som, nako tigiibi sua sanaŋan boozo pini.