Sua Tutŋana 21:4-15

⁴Wal sananŋan matan pasom zin tomtom mi tipakurkur zitun ma tiso tilip pizin. Gorgori ŋgar sananŋana tana ikamam peeze pizin. Tanata tinoknok sanaana kamŋana.

⁵Zin wal ta tikamam kat uraata raama ŋgar na, uraata kizin ilonloondo ambai mi iurur ŋonoono. Mi zin wal ta gorgori tirru zaala be tindou len koroŋ boozo karau men, na uraata kizin ko iur ŋonoono som, mi tisu ma timbot ŋoobo.

⁶Sombe takam lende koroŋ boozo pa zaala ki pakaamŋana, na koroŋ tana ko irao imbot ma molo na som. Ko imap karau men kembei ta ŋauŋau, mi iwe kilis piti, mi ipasaana iti.

⁷Wal sananŋan ta titekteege zaaba pizin tomtom na, mbulu kizin tana ko imiili pizin mi ipasaana zin. Pa zin lelen be tikam mbulu ndeeŋeŋana ri sa som.

⁸Wal sananŋan tipaŋobŋoobo pa zaala ambaiŋana. Mi wal ndeeŋeŋan na, mbulu kizin iŋgeeze men.

⁹Sombe kusim inoknok zooroŋana mi iŋoŋooŋo, na mbotmbot raami lela ruumu pepe. Ambai be zemi mi pera lem mat!

¹⁰Wal sananŋan lelen pa mbulu sananŋana ilip. Mi irao timuŋai waen bizin pakan na som.

¹¹Zin wal ta tipakurkur zitun mi tirepilpiili ŋgar ambaiŋana na, sombe tire kadoono pa mbulu kizin, nako ipei ŋgar kizin wal ta len ŋgar biibi som na. Mi zin wal ta len ŋgar ambaiŋana na, sombe tapaute zin, nako tikam len ŋgar pakan ma isala ki.

¹²Anutu, ni ndeeŋeŋana, mi iute mbulu boozomen ta iwedet lela wal sananŋan ruumu kizin. Tanata ipasansaana zin.

¹³Tomtom sa isombe izeeze talŋaana pa tiŋiizi kizin wal ta timbotmbot raama pataŋana na, kozo ire i. Pa kaimer sombe itaŋroro pa le ulaaŋa sa, nako irao tileŋi na som.

¹⁴Sombe tomtom sa keteene malmal kat piti mi teseŋgeere le koroŋ ambaimbaiŋan pakan, nako tapaluumu leleene. Seŋgeeri ta so takam pini ki keŋana, nako iurpe leleene.

¹⁵Sombe zin bibip tiurpewe pataŋana kizin tomtom, ina ikam zin wal ndeeŋeŋan ma lelen ambai kat. Tamen zin wal ta tikamam mbulu sananŋana na, tire ma timoto kan.