Sua Tutŋana 19:3-27

³Wal pakan mbulu kizin kankaanaŋana ta ipasansaana mbotŋana kizin. Tamen tiurur uunu ila ki Yooba, mi keten malmal pini sorok.

⁴Sombe iti lende koroŋ boozo, nako wal boozo lelen be tigaaba iti ma tiwe torondo bizin. Mi zin wal ta len koroŋ somŋan na, toron bizin ŋonoono tipizil ndemen pizin tomini.

⁵Tomtom ta so ipombol sorok sua pakaamŋana, na ni kola ire ka kadoono. Irao tileeli na som. Mi zin wal tau gorgori timbelmbel sua pakaamŋana ta kembena. Kadoono tabe ise kizin i, na tirao be tiko pa na som.

⁶Zin bibip ta tikamam peeze i, na wal boozomen tirru zaala be tikam lelen. Mi tomtom ta so irairai koroŋ kini, nako tomtom ta boozomen lelen be tigaabi ma tiwe toroono bizin.

⁷Tomtom sorrokŋana na, waene bizin timbotmbot molo pini. Sombe iso pizin be timar kini, na irao tileŋi na som. Mi toŋmatiziŋ kini ŋonoono tomini, tiurur lelen pini som.

⁸Tomtom ta so leleene be kunuunu imbot ambai, nako iru zaala be ikam le ŋgar ambaiŋana. Mi sombe tomtom sa mataana iŋgalŋgal be ikiskis ŋgar ambaiŋana, inako indeeŋe mbotŋana ambaiŋana.

⁹Tomtom ta so ipombol sorok sua pakaamŋana, na ni kola ire kadoono pa mbulu kini tana. Irao tileeli na som. Mi zin wal ta timbelmbel sua pakaamŋana ta kembena. Ko tisaana ma tila len.

¹⁰Wal kankaanaŋan ta tizorzooro na, sombe tikam len mboti ambaiŋana kat, ina irao pa ŋgar kiti som. Mi sombe tiur mbesooŋo sorok sa ma iwe biibi be ikam peeze pizin bibip pakan, ina tomini, ambai som kat.

¹¹Tomtom ta so le ŋgar ambaiŋana, nako keteene malmal karau som. Tana tere mbulu kini na, iŋgeeze men. Pa sombe tomtom tikam ŋoobo mbulu pini, na ni irao ikam ŋgar biibi pa na som. Ire kembei koroŋ sorok.

¹²Sombe king keteene malmal, ina ikamam ti ma tomototo kembei laion ta kalŋaana izalla be ikan tomtom. Mi kampeŋana ki king, ina kembei tolou ta izzu mi ipalumluumu kini.

¹³Wal kankaanaŋan ta tizorzooro na, tipasansaana mbotŋana ki taman bizin. Mi sombe kusindi bizin tinoknok zooroŋana mi tiŋoŋooŋo, inako tikam ma mbotŋana kiti isaana kembei ruumu ta ka kooto sumbunsumbun, mi yaŋ itoptop su ruumu leleene na.

¹⁴Ruumu mi pat, ina matamur ta tamanda ma nanda bizin tikamam piti. Mi sombe towoolo moori ŋonoono ta le ŋgar ambaiŋana, ina kampeŋana biibi ta Yooba ikam piti.

¹⁵Wal maolŋan sombe tikeene, na tizemke zin kat. Mi tomtom ta so ikamam uraata som mi imbomboorene sorok, nako peteli.

¹⁶Tomtom ta so ikamam ŋgar pa itunu be imbot ambai, nako mataana iŋgalŋgal be ito kat zaala ambaiŋana. Mi tomtom ta so irepilpiili zaala ambaiŋana mi itoto som, na ni ko imeete ma ila lene.

¹⁷Tomtom ta so ikampewe zin wal sorrokŋan, ina ni ikamam mbulu tana pa Anutu. Mi kaimer Anutu itunu ko ipokot mbulu kini tana.

¹⁸Pazal lutum pataaŋa. Pa iŋgi mazwaana ta ni ileŋleŋ la sua ku. Re beso pazali som, ina kembei nu lelem be ni imeete ma ila lene.

¹⁹Tomtom ta so keteene malmal karau, nako ire ka kadoono. Wal ta kembei, uulu zin pa pataŋana kizin pepe. Pa kaimer zin kola tikam mini mbulu raraate men tau.

²⁰Sombe tomtom tisope u mi tipazalu, na leŋ la kalŋan. Pa ina zaala tabe nu kam lem ŋgar ambaiŋana.

²¹Iti tomtom lelende iurur pa mbulu matakiŋa be takam. Mi bela ŋgar kiti ito ŋgar ki Yooba, to iur ŋonoono.

²²Sombe tuurur kat lelende pizin tomtom mi tototo sua kiti mbukŋana, ina koroŋ biibi kat. Mbulu ta kembei, tomtom lelen pa ilip. Sombe lende koroŋ som mi tombot ŋoobo, na turu zaala pakaamŋana sa bekena tawatke lende koroŋ pepe. Ambai be tombot ŋoobo.

²³Mbulu ki tomototo Yooba mi teleŋleŋ la kalŋaana, ina zaala tabe tombot ambai pa i. To tomoto koroŋ toro sa som, mi takam kene kiti ma ambai men, mi pataŋana sa irao ipasaana iti som.

²⁴Wal maolŋan naman isula timbiiri leleene be tipei kan kini. Tamen naman ipata be tiur ila kwon.

²⁵Zin wal ta tipakurkur zitun mi tirepilpiili ŋgar ambaiŋana na, sombe tabalis zin, ina ambai. Naso zin wal ta len ŋgar biibi som na tire mi ipei ŋgar kizin. Mi zin wal ta ŋgar kizin ipet kek na, tabalis zin pepe. Toso men sua be tapazal zin. Pa zin ko tikam ŋgar.

²⁶Pikin ta so imaŋga pa tamaana, mi iziiri naana ma ila lene pa ruumu, ina ni ipamiaŋ zin biibi kat.

²⁷Lutuŋ, nu sombe zeeze talŋom pa sua pazalŋana, ina ambai. Zeeze lak! Naso nu talli kat pa ŋgar ambaiŋana!