Sua Tutŋana 17:5-14

⁵Tomtom ta so igibgiibi sua repiiliŋana pizin wal sorrokŋan, ina ni kwoono pasom Anutu tomini. Pa ni ta iur zin wal sorrokŋan ma tipet. Mi tomtom ta so ire tomtom toro ibaada sorok pataŋana mi leleene ambai pa, na ire i. Pa ni kola ire kadoono pa mbulu kini tana. Irao Anutu ileeli na som.

⁶Tomtom ta so iwe kolman kat mi ire tumbuunu bizin, nako niini ise. Paso tumbuunu bizin tana tiwe kembei aigau pini be tomtom tiwit uruunu. Mi zin pikin ta kembena. Nin se pa mbulu ki taman ma nan bizin.

⁷Wal kankaanaŋan ta tizorzooro na, mbulu kizin pakurŋana tere kembei ambai som. Mi sombe zin bibip ta tikamam peeze i tipakamkaam, ina ambai som kat!

⁸Zin wal ta tiwadat zin tomtom pa pat bekena tito ŋgar kizin na, tindemeere pat kizin tana kembei ta naborou i. Pa tire kembei pat tana iuluulu uraata kizin ta boozomen ma ilonloondo ambai men!

⁹Iti sombe tuurur lelende pizin tomtom, nako matanda imbiriizikaala sanaana kizin. Mi tomtom ta so izeizei lene sua kizin wal pakan mi iyyo kwoono pa, na ni irao ikam ma itiŋan torondo bizin ŋonoono taparmbot molo piti.

¹⁰Tomtom ta so ŋgar kini ipet kek na, sombe tayaambi, nako karau men mi itooro mbulu kini. Mi wal kankaanaŋan ta tizorzooro na, som. Sombe tabalis zin pa re pa tomto lamata, na takamam lende men. Mi irao titooro mbulu kizin sananŋana na som.

¹¹Wal sananŋan, ŋgar kizin imbol kat be tikam mbulu zooroŋana. Tana kaimer biibi sa kola ila ma ibalis kat zin. Mi ni ko irao imuŋai zin ri sa som.

¹²Ŋge saŋsaŋŋana ta so ipeebe na, koroŋ ambai som. Sombe la garau ŋgini kini, nako imaŋga mi ikanu. Mi wal kankaanŋan ta tizorzooro na, zin ambai som kat. Pa mbulu kizin talliŋana irao be ipasaana katu. Tana la garau zin pepe.

¹³Tomtom ta so tikam mbulu ambaiŋana pini mi ipokot pa mbulu sananŋana, na ziŋan wal kini mbotŋana kizin ko isaana kat ma imborene ta kembei. Irao ambai mini na som. Som kat.

¹⁴Sombe pataŋana sa ipet na, kwom la pa karau pepe. Zem sua pa. Kokena kam ma ŋoŋi musaana ila ma iwe pataŋana biibi ŋonoono.