1Tedae namah tah kaimih Pathen, sitlohnah neh rhennah la na om, Hno cungkuem soah uehnah, sitlohnah neh na uktaem coeng.
2Ka tholh uh mai cakhaw namah hut la ka om uh tih, na thaomnah ka ming uh. Tedae kaimih he namh hut la nan pom te ka ming uh dongah, ka tholh uh mah pawh.
3Namah mingnah he duengnah a soep la om tih, na thaomnah ming khaw hingnah a yung la om.
4Hlang kutthaih kah a thae poeknah long khaw, mueidaep thapang kah thaihhuk long khaw, soeprhaep pangcing aka kap muei long khaw n'vuelvaek boel saeh.
5Tekah a muei loh hlang ang aka hue rhoek a cahoeh tih, mueiduek neh pum aka hing pawt te a ngaih uh.
6A thae hno aka lungnah tah te bang ngaiuepnah neh ni a tluk, Te rhoek te a huengaih bangla a saii tih hnap a bawk uh.
7Ambop loh lai noe a deaeng, te mamih bitat dongkah baelyak hamla ngaelngael a hlom, Amah te dikpo te a hlinsai bal, Te a cim baelyak lam khaw amh te a hnonah tih, um am mailai lamkah amah te a hnonah boeiloeih. Tedae te te metla a hnonah ham a khaw, dikpo aka saii kah a poeknah dongah ni a om coeng.
8Te bibinah dongah ka coih dikpo neh aka duek pathen la a saii, Amah aka duek pataeng khaw hlaem paek kah a tuei toi ah ni diklai lamloh a saii. Kolkalh a om phoeih te amah loh nah diklai la mael ni, a tue a phae vaengah a hinglu aka vat kung taengla mael.
9Bibikung rhoek loh hlangduek loh duek a paan tih, hingnah khaw a toica mai ni tite poek pawh. Tedae sui neh cak bibi la tlungmu tih, rhohum bibi ni a mangtuk thil. mueirhol pathen a thai te thangpomnah la a tae uh.
10A thinko te hmaiphu la om tih, a ngaiuepnah he khonuen la a phu om pawh, a khosaknah khaw laipi lakah a phum om pawh.
11Amih te amah a hlinsai khaw, ami hing lu tatvuet ham aka ueng pah khaw, a khuikah hingnah mueihla aka hmuh pah khaw, ming hamla hloo uh coeng.
12Amamih a coengnah te omyoe kah luemnah bangla, a hingnah te hoeikhangnah ham rhoekthoeknah bangla a ngai uh. Amamih long tah tangka n'dang mak atah a thae lam khaw sai sih a ti uh.
13Te rhoek long te diklai lamloh amrhaeng paikaek neh muei thuk a saii vaengah, a tholh uh khaw a tloe lakah muep a ming uh.
14Tedae na pilnam aka hnaemtaek thunkha boeih tah, cahni lakah khaw ang ngai tih khomap coeng.
15Amih loh namtom kah mueirhol te pathen a ti uh. Te rhoek long a mik nen khaw hmuh thai paw tih, A hnarhong neh hil thai pawh, A hna nen khaw ya thai paw tih, A kut dawn nen khaw yaknga thai pawh, A kho khaw caeh nah thai pawt dae ta.
16Te te amah kah hing aka vat nawn hlanghing long a saii dae, Amah neh aka lo uh la pathen aka saii thai koe a om moenih.
17Pilnam he aka duekkoi la om tih lailak kut ne a saii khaw duek, Amih tah amamih a bawk hno lakah rhoei ngai dae ta, amih tah hingnah a khueh tih muei loh a khueh moenih.
18Te phoeiah tueilaeh aka coeng koek rhamsa khaw a bawk uh, Amih te cueih aka khueh mueh neh thuidoek vaengah, A tloe boeih lakah khaw thae tangkik coeng.
19Amih khaw rhamsa bang boeiloeih ni, Amih hue ngaih ham khaw a suisak a then aih moenih. Tedae amih te tah Pathen kah thangpomnah neh a yoethennah loh a rhael coeng.
