Solomon Cueihnah 3

1

2

3

4

5

6

7

8

9

10

11

12

13

14

15

16

17

18

19

¹Hlang dueng kah hinglu tah Pathen kut ah om tih, nganboh loh amih te ben mahpawh.

²Aka ang rhoek kah mikhuh ah tah amih te aka duek kamboei la om tih, a vuenvanah khaw pocinah aka om ham bangla a poek

³Mamih lamloh a nong uh a pocinah la om dae, ngaimong la om uh bal pueng.

⁴Hlang mikhmuh ah khoboe yook bangla om dae, amih kah ngaiuepnah tah aka nguel hno neh cungkuem.

⁵Toelnah he yool pueng tih a then he kum ngai. Pathen loh amih a noemcai tih amah neh tingtawk tila a hmuh.

⁶Hmaihueng khuikah sui bangla amih te a noemcai tih, amih te hmueihhlutnah bangla a doe.

⁷Amih a hipnah tue vaengah tah vang sui dae, Divawt hmaidi bang lamni a tloo eh.

⁸Namtom te a uk uh vetih pilnam khaw a taem uh ni Boeipa loh amih te kumhal duela a manghai thil ni.

⁹Amah dongah aka pangtung rhoek loh oltak a yakming vetih, uepom hlang te a lungnah dongah kho a sak ni. A hlang cim soah tah sitlohnah neh lungvatnah om tih, a hlang tuek te tah a dawn hueltue.

¹⁰Lailak rhoek loh ammih kah kopoek thae bangla a yook, Amih loh duengnah a hnoelrhoeng tih, Boeipa te a tloelh pai ta.

¹¹Cueinah neh thuituennah aka hnawt tah khomap, A ngaiuepnah te a hong la poeh tih, a thakthaenah khaw a phu om pawh.

¹²A yuu rhoek khaw ang uh tih, a ca rhoek khaw muen uh.

¹³Amih koca ngawn tah kumhal duela thae a phoei thil coeng.

¹⁴Hlueikhu khaw a kut a halangnah khueh pawt tih, Boeipa taengah halangnah a khueh pawt atah, a yoethen.

¹⁵A then bibi he tah a thaih rhah tih, Yakmingnah kah a yung he khaw bawt tlaih pawh.

¹⁶Tedae samphaih ca rhoek tah lungcuei la om pawt vetih, lailuk calai lamkah aka lo khaw paltham ni.

¹⁷A hinglung vang mai cakhaw hinyahnah dang pawt vetih, A patong vaengah hlang loh a hnael ni.

¹⁸A camoe ah duek cakhaw ngaiuepnah tal vetih, laitloeknah hnin ah khaw mongnah om mahpawh.

¹⁹He tah aka dueng pawt rhoek ham, aka tlo koek a hmailong a bawtnah pawn ni.