Soakas 6:11-35

¹¹A ke el motul, ma lal nukewa ac wanginla, oana in pisrapasrla sin sie mwet sulallal.

¹²Mwet lusrongten ac mwet koluk elos forfor ac kinauk kas kikiap.

¹³Elos kotmwet ac oru mwe akul ke lumahlos in kiapwekom,

¹⁴ac pacl se na elos oru ma inge uh elos akoo in oru pwapa sulallal ma oan selos. Elos pirakak ma koluk yen nukewa.

¹⁵Ke ma inge mwe ongoiya ac fah sikyak nu selos tia suiyak pah, ac elos fah kunausyukla ac wangin kasru ku in orek nu selos.

¹⁶Oasr ma onkosr su LEUM GOD El srunga; aok, itkosr mwe srungayuk nu sel su El tia ku in muteng pa inge:

¹⁷Ngetnget filang, Loh kikiap, Po su aksororye srahn mwet wangin mwata,

¹⁸Sie inse su kinauk pwapa koluk, Ne su sa in kasrusr nu ke ma koluk,

¹⁹Sie mwet orek loh kikiap, Ac sie mwet su pirakak mwe sraclik in masrlon sou.

²⁰Wen nutik, oru ma papa tomom el fahk nu sum, ac nik kom mulkunla ma nina kiom el luti kom kac.

²¹Sruokya kas lalos in oanna insiom pacl nukewa.

²²Mwe luti lalos uh ac kol kom ke pacl kom fufahsryesr, ac karingin kom ke fong, ac akkalemye ma kom in oru ke len.

²³Mwe luti lalos uh sie kalem nu sum, ac kas in kai lalos ac fah luti kom ke ouiyen moul.

²⁴Ku in sruokkomi liki mutan koluk, ac liki kas in akmunas lun mutan kien kutena mukul saya.

²⁵Nimet sruhfla ke oasku lalos, nimet sremla ke elos kotmwet nu sum uh.

²⁶Sie mukul ku in sang na molin lof in bread se in moli sie mutan kosro su eis molin kosro lal, tuh el fin orek kosro nu sin mutan kien siena mukul, ma lal nukewa ac fah wanginla.

²⁷Ya kom ku in us e iniwom ac nuknuk lom tia firiryak?

²⁸Ya kom ku in fahsr fin mulut fol ac niom tia folla?

²⁹Sensen ke ma inge oapana ke kom utyak nu yurin mutan kien siena mukul. Kutena mwet su oru ouinge uh ac sun keok.

³⁰Mwet uh tia arulana srunga mwet pusr el fin pisrapasr in akkihpyal ke el masrinsral;

³¹a el fin koneyukyak, el enenu in akfalye pacl itkosr — el enenu in sang ma lal nukewa.

³²Tusruktu sie mukul su orek kosro nu sin mutan kien siena mukul, wangin etauk lal. El sifacna oru ma ac kunausulla.

³³Ac fah akkolukyeyuk el, anwuk el, ac mwekin lal ac fah tiana wanginla nwe tok.

³⁴Wangin kasrkusrak lun sie mukul payuk ku in oana kasrkusrak lal ke el lemta; ac fah wangin nunak munas lal nu sin mukul sac ke pacl se el ac orek foloksak kac.

³⁵El ac fah tia eis kutena mwe moul in akfalye; wangin kutena mwe kite ku in akwoyela kasrkusrak lal uh.