Erubasa 6:11-35

¹¹ne egketik-ew egkehitavù diyà te keniyu is kewewezai he iring te kebpekeuma te neǥumeenan he tulisan.

¹²Is menge etew he wazè dan pulus wey is mezaat is menge ulaula zan, ne iyan dà idsuǥuksuǥuk dan is ebpemenudtul te tarù.

¹³Ebpemengendat sikandan wey ebpeuy-uyawà pinaaǥi te menge velad wey paa zan para te kedlimbung te zuma.

¹⁴Tenged te kebmesinupaken dan, layun dan ebpelanu te kebaal te mezaat, wey iyan sikandan ebpemuunà te samuk.

¹⁵Umbe, egketik-ew egkehitavù diyà te kandan is kezeetan; segugunè dan ebpekehendiyà te kezeetan ne wazè en paaǥi wey zan melibri.

¹⁶Duen pitu he kelasi te etew he egkeepesan wey edumutan te Nengazen:

¹⁷is menge gelbuwen, is menge teruen, is menge memumunù,

¹⁸is menge ebpelanu te mezaat, is menge elistu te kebaal te mezaat,

¹⁹is menge ebpemenistiǥus te tarù, is menge edretem te menge kesamuk diyà te zuma zan.

²⁰Mama, sunuza nu is menge suǥù wey ibpenurù te ginikanan nu kenikew.

²¹Ipemula nu heini ziyà te ǥehinawa nu su wey kenè nu heini melipati.

²²Emun edhipanew ka ne iyan heini egkehimu he ǥiya nu, ne emun edlipezeng ka ne iyan heini egkehimu he vantey nu, ne emun egkepukew ke en ne iyan heini edsambag kenikew.

²³Su heini is menge suǥù dan wey menge penurù iring te sulù he ed-anlag diyà te kenikew. Ne is menge kedawey zan kenikew, ebpeketandang te vetasan nu, ebpekeuǥup wey ebpekepeluǥayad te untung nu.

²⁴Ne pinaaǥi kayi ebpekelikey ka te vahi he mengungumpadi wey kenè ka egkeuwit te mekevivihag he menge lalag din.

²⁵Kenè ka petintal tenged te kekempet din. Kenè ka peuwit te mekevivihag he menge mata zin.

²⁶Su is kebpekidhilavet te vahi he ebelegyà te zengeg din, utew ebpekepepubri zutun te edhilavet, piru kedhilavet te esawa te zuma, ne ebeyazan nu te untung.

²⁷Is etew he edsepipi te hapuy, egketutung is bisti zin;

²⁸is edhipanew ziyà te vaǥa, egketutung is paa zin.

²⁹Ne iring din ded daan is maama he egkevut te vahi he zuen din en esawa su kenà ebpeseyluwen, kekenà, edsilutan sikandin.

³⁰Kenà edsudien te menge etew is tekawen emun iyan ibpenakew zin te keenen su ǥeina te egkeumes en sikandin.

³¹Iyan, emun egkezekepan sikandin, ne ibpevayad sikandin te kepipitu edtekepa is bali zutun te midtakew zin, minsan pa ke pinaaǥi kayi egkeamin is langun he azen din.

³²Is etew he edhilavet te zuen din esawa ne kenà metau he ed-isip te hustu. Iyan dà sikandin ed-uney edezaat te lawa zin.

³³Ebpesekitan sikandin ne egkepeel-elezan taman te taman.

³⁴Ne is ebpengelikud he teǥiesawa zutun te vahi he edhilevetan, ne utew egkererengiti, ne wazè din en kegkehizu emun ebelesan din is midsalàsalà diyà te kandin.

³⁵Kenè din en edewaten is ibayad diyà te kandin ne kenè en sikandin egkepeypeyuan minsan sengemenu pa kezekelà is ibpayùpayù kandin.