Soakas 5:2-23

²Na ouiyen moul lom ac fah suwohs, ac kas lom ac fahkak lah oasr etu lom.

³Ngoasron mutan kien siena mukul ac ku in emwem oana honey, ac oalul fwel oana oil in olive,

⁴tusruktu ke safla pwar nukewa, mwe keok mukena pa ac tuku kac.

⁵Mutan sac ac kolkomla nu in facl in misa. Inkanek ma el fahsr kac pa inkanek nu ke misa.

⁶El kuhfla ac alfokfokla liki inkanek in moul, ac el tia akilen acn el fahsr we.

⁷Lohngyu inge, wen nutik uh, ac tia mulkunla ma nga fahk nu suwos.

⁸Fahsr liki mutan ouinge uh! Nimet kalukyang nu ke mutunoa sel.

⁹Kom fin oru, na sunak ma tuh orek nu sum meet ac fah orek nu sin kutu na mwet, na kom ac fah fusr na misa inpoun mwet wangin pakomuta yoro.

¹⁰Aok, mwetsac uh ac eisla mwe kasrup lom nukewa, ac ma kom kemkatu nu kac ac fah ma lun siena mwet.

¹¹Kom ac fah oan sasao fin mwe oan kiom. Ikom ac monum ac fah mongola,

¹²ac kom fah fahk, “Efu ku nga koflana etala? Efu ku nga tuh srunga mwet in lutiyu?

¹³Nga tuh tiana lohang nu sin mwet luti luk nukewa, ac tiana porongalos.

¹⁴Ac inge nga akilenak lah akmwekinyeyuk nga sin mwet nukewa.”

¹⁵Kom in pwaye nu sin mutan kiom sifacna, ac sang lungse lom nu sel mukena.

¹⁶Tulik ma kom osweang nu sin kutena mutan saya uh, ac wangin sripa nu sum.

¹⁷Lela tulik nutum uh in kapak ac kasrekom, a in tia muta kasru mwet saya.

¹⁸Ke ma inge kom in engan sin mutan kiom, aok mutan fusr se na ma kom tuh payukyak se ah,

¹⁹su tuh kato ac wo lumah oana soko deer mutan. Lela oaskuiyal in mwe akenganye kom. Lela elan kafiskomi ke lungse lal.

²⁰Wen nutik, efu ku kom in sang lungse lom nu sin siena mutan? Efu kom kaukya iniwen mutan kien siena mukul?

²¹LEUM GOD El liye ma nukewa kom oru. Acn nukewa kom fahsr nu we, El liye kom.

²²Orekma koluk lun sie mwet koluk oana sie mwe kwasrip. El ac sremla ke sie nwek ke koluk lal sifacna.

²³El misa ke sripen el tia sifacna liyaung orekma lal. Lalfon lal pa kololla nu in kulyuk lal uh.