Zinama Tumatumae 5:2-23

²pude mu boka kopu pule nigo pa binalabala leadi, meke boka naqitia sa tinumatumae.

³Sina sa mamalaiṉina sa barikaleqe barabaratana si lomoso guana zipale, meke sa zinama tanisa si memehe guana oela.

⁴Ba pa vina betona si pasa guana sile, meke ṉaru guana magu sapu ṉaru vari kali.

⁵Sa nenena si neti gore la pa minate, meke sari inene tanisa si tuturaṉa toṉoto la pa lovu.

⁶Asa lopu balabala hokaria sa hahanana tinoa, sari siraṉa tanisa si koqi, ba lopu gilania sa.

⁷Ego tuqu, mu avoso mae koa rau; mu lopu muliṉi ni gua sapu zama ni rau.

⁸Mu enea sa siraṉa sapu seu koa sa barikaleqe asa, lopu ene tata la ia sa sasada vetu tanisa,

⁹kote gua meke vari poni nia goi sa mua ṉiniraṉira arilaena koari kaiqa, meke mate mokue pa limana sa palabatu tanisa barikaleqe barabaratana.

¹⁰Uve, sari votiki tie kote deṉa ni sari mua tinagotago, meke sa mua minabo si kote votiki tie tu na tagoi.

¹¹Pa vina betona sa mua tinoa si kote soliṉi si agoi, totoso hokoto ni na tinoa sari tini, masa, na ehara.

¹²Kote zama si agoi, “Vegua ke hako ta totoli si arau pa votiki tie? Vegua ke kilua tu rau sa siraṉa toṉotona?

¹³Na vea ke lopu va tabei rau sari tie va tumatumae babe va avosi sari qua tie tarae?

¹⁴Ele kamoa rau sa vina betona sa kinaleana; meke doṉo hikare si rau pa kenudia ri na butubutu.”

¹⁵Mu napo mo pa mua vovoina kolo soti, mu lopu zoropo hoboro nia mo pa sisiraṉa sa kolo pa mua berukehe.

¹⁶Sari mua bukaha si kaqu zoropo la tu pa sisiraṉa? Meke sari mua tototolo si kamo latu koari na varivarigarana?

¹⁷Na kaqu na mia eke mo sapu asa, lopu pude somana nia ari votiki barikaleqe.

¹⁸Mani na bukaha minana sa mua barikaleqe koa goi; mamu qetu nia sa barikaleqe haba ia goi totoso vaquramu,

¹⁹sapu leleana meke tolavaena guana kurukuru dia. Mamu qetu nia doduru totoso sa nana tinolava; mamu qetuqetu nia doduru totoso sa nana tataru.

²⁰Tuqu, vea ke kote ta turaṉa va sea tu koasa barikaleqe barabaratana? Vea ke kote hiva ṉaza ia tu goi sa barikaleqe tana votiki tie?

²¹Ura sari na tinavete tana tie si dogoro betoi mo e Zihova, meke tumae ni Sa sari doduru nana inene.

²²Sa tie kaleana si sipata pule nia mo koari nana sinea; ta pusi ni sa sari iku tadi na tinavete kaleadi pu taveti sa.

²³Kote mate nia sa sapu loke tinarae boka lulia; ta turaṉa va seu koari nana dinuviduvili.