Soakas 21:9-29

⁹Ac wo in muta fin mangon lohm uh, liki in muta in lohm uh wi sie mutan torkaskas.

¹⁰Mwet koluk elos kena oru ma koluk pacl nukewa; wangin pakomuta lalos nu sin mwet.

¹¹Ke pacl se kaiyuk sie mwet inse fulat, na sie mwet sulalkung el ac ku in eis etauk kac. Sie mwet lalmwetmet el eis etauk ke ma lutiyuk el.

¹²God, su suwoswoslana, El etu ma orek in lohm sin mwet koluk, ac El ac fah eisalosyang nu ke ongoiya.

¹³Kom fin srangesr lohng pang lun mwet sukasrup ke elos suk kasru, na ke kom ac pang in suk kasru, ac fah tia pac lohngyuk kom.

¹⁴Sie mwet fin mulat sum, na sie mwe sang in lukma ac ku in akmisyella.

¹⁵Pacl ma orekla sie nununku suwohs, mwet wo uh insewowo, a mwet koluk elos toasrla.

¹⁶Misa soano kutena mwet su tafongla liki inkanek lun etauk.

¹⁷El su sisla mani yohk nu ke mwe kasrup, wain ac mongo yuyu, ac fah tiana kasrup.

¹⁸Mwet koluk sifacna use nu faclos mwe keok ma elos srike in oru nu sin mwet wo.

¹⁹Wo in muta yen mwesis liki in muta yurin sie mutan su lungse torkaskas.

²⁰Mwet lalmwetmet uh pus mwe kasrup ac mwe insewowo lalos, a mwet lalfon uh sa na in sisla mani lalos.

²¹Kom in kulang ac suwosna, na ac fah loes moul lom; mwet uh fah akfulatye kom ac oru wo nu sum.

²²Sie mwet kol lalmwetmet lun un mwet mweun, ku in sruokya sie siti ma karinginyuk sin mwet na watwen, ac kunausla pot ma elos lulalfongi yohk kac.

²³Kom fin tia lungse sun mwe lokoalok, karinganang ma kom fahk an.

²⁴Sie mwet inse fulat el nunku kacl sifacna, ac el filang ac konkin.

²⁵Sie mwet alsrangesr su srunga orekma, el sifacna oru elan misa —

²⁶pwayena ma el nunku pa el suk in pus ma lal. A sie mwet suwoswos el insewowo in sang ac tia sruok.

²⁷LEUM GOD El srunga mwe kisa lun mwet koluk, yokna elos fin oru ke nunak koluk lalos.

²⁸Kas lun sie mwet loh kikiap fah tia lulalfongiyuk, a kas lun sie mwet su nunkala mau wo fah lohngyuk.

²⁹Mwet suwoswos elos okak in etu lalos; mwet koluk uh tia sruhk etu a elos kwafelos mwet in liye mu elos etu.