Soakas 1:5-23

⁵Soakas inge ku pac in akyokyelik etauk lun mwet lalmwetmet, ac sang inkanek pwaye nu sin mwet etauk

⁶tuh elos in ku in etu kalmac lukma lun soakas, ac kalmen pupulyuk lun mwet lalmwetmet.

⁷Sangeng sin LEUM GOD pa mutaweyen etauk. Mwet lalfon uh pilesru lalmwetmet, ac srunga suk etauk.

⁸Tulik nutik, lohng kas in luti lun papa tomom ac nina kiom.

⁹Mwe luti lalos uh ac mwe nawu moul lom oana sie mwe yun nu fin sifom, ku sie mwe walwal nu inkwawom.

¹⁰Tulik nutik, mwet koluk fin kwafe kom, nik kom wi.

¹¹Elos fin fahk, “Fahsru kut som kasriki sie mwet ah, ku kutu mwet wangin mwata, ac uniya mwe na pwar.

¹²Sahp pacl se kut ac sonolos elos ac moul na fokoko, tusruktu pacl se kut tari selos elos ac misa!

¹³Kut ac konauk mwe kasrup pus ac nwakla lohm sesr ke ma kut pisrala.

¹⁴Fahsru wi kut. Kut ac kitalik ma nukewa in oana sie nu sesr kewa.”

¹⁵Tulik nutik, nimet wi mwet ouinge uh. Fahla lukelos.

¹⁶Elos rarala in oru ma koluk. Elos akola pacl nukewa in akmas.

¹⁷Tia wo in akoo sie sruhf, ke won se ma kom ke sruokya uh el tu na liye,

¹⁸mweyen mwet oru ouinge uh sifacna akoo mwe kwasrip nu selos, sie mwe kwasrip ma elos ac misa kac.

¹⁹Pacl nukewa, pisrapasr uh ac eisla moul lun mwet rapku — pa inge ma ac sikyak nu sin kutena mwet su moulkin moul sulallal.

²⁰Porongo! Lalmwetmet el pang inkanek uh ac in iwen kuka uh.

²¹El wowoyak ke mutunoa in siti uh, ac in acn nukewa mwet uh tukeni we:

²²“Mwet lalfon, kowos ac lungse in lalfon putaka? Kowos ac pwarkin in aksruksruki etauk uh nwe ngac? Ya kowos ac tiana lutlut in etu mau?

²³Lohng ke pacl nga kai kowos. Nga ac sot kas in kasru wo ac oayapa etauk luk nu suwos.