Sion 8:30-56

³⁰Navong Iesu viten tounah keil enek, meatin keil houlu akur anatin eni keke vi Mesaea anatin.

³¹Evus, Iesu lesi keke tei en Siu keil akur anatin eni, ka viteni min keil vit, “Munak mihehikiti keke mihelong kat hihiseien keil onak, hetie lati keke mihehi meatin keil onak anatin.

³²Miheilea asa koa vi anatin, ka anatinien enek hesakin kami mihemaluv anatin.”

³³Ka keil avit, “Komai mevi vatiamal onen Ebraham, ka mervitei slev onen etai meatin en avong etai. ?Sakini, vensa varei koviteni keke komai mehemaluv anatin?”

³⁴Iesu viteni min keil vit, “Naviteni anatin min kami keke meatin vasi koa amumon tisaen umai avi slev keil teni.

³⁵Ka slev tai, vulin tovuol en vatiamal kati onen masta onen. Ka natin masta enek, vulin kati en vatiamal onen mul lisenges.

³⁶Sakini, munak Natin Ahi sakinuk komaluv, kimaluv anatin.

³⁷Nakilea keke kami mivi vatiamal onen Ebraham keil. Ka avaseini, mimul misak visi mivalekat sise keke mivou vini nau vaka ien. Ka emi vati keke mivou vini nau veni out tovuol en tinomi keke selusien onak vaha vato ien.

³⁸Inau namul navit mesein asa koa nalesi navong naro ral min Tata onak. Ka kami, mimul mimumon asa koa tata onami viteni min kami keke mivoumoni.”

³⁹Keil avit kesi avit, “Tata onomai Ebraham.” Ka Iesu viteni vit, “Munak kami mivi titan Ebraham keil anatin, kami mivaleisungein sakien keil onen.

⁴⁰Inau navit meseini min kami anatinien koa Ahi viteni minau. Ka kami, misak visi mivou vini inau. Koanek rovitei sakien keil onen Ebraham.

⁴¹Vuo. Kami mimul mimumon sakien keil onen tata kati onami.” Ka keil aviteni avit, “!Ei! !Rovitei komai koa mevi ehon keil ten sise! Tata onomai tas, koa vi Ahi varei.”

⁴²Iesu viteni min keil vit, “Munak vi anatin keke Ahi vi Tata onami, envatien onami val enau. Veni inau naka ven Ahi, ka kosa, namul ekok. Narmaitei vousil rendemien onak, ka Ahi sila inau.

⁴³Ka nakilea vensa varei kami misakras mivalong kilea asa koa naviteni. Veni emi rovattei mivailea en selusien keil onak.

⁴⁴Tata onami vi Temat varei ka emi vati mivoumon asa koa kei en vati kami mivoumoni. Veni kei sakin meatin keil amu vinvini mesav keil en avong telamu rokol kosa. Kei romultei en usite ten anatinien, veni anatinien tovuol ien. Navong mul liluvos, mul viten selusien kati onen, veni kei vi uti luvosien ka vi tata onen koakeil aliluvos.

⁴⁵Sakini, veni asa koa inau naviteni min kami vi anatin, kami mirkurtei anatin enau.

⁴⁶?Isei en kami kilea vahit lat asa varei namumoni tisa? Misakras. ?Ka munak naviten asa koa vi anatin, vensa varei mirkurtei anatin en selusien keil onak?

⁴⁷Koakeil avi meatin keil onen Ahi amul along kilea selusien keil onen. Ka kami mirvitei onen Ahi, sakini mirlong kileatei.”

⁴⁸Siu keil aselus karen Iesu avit, “!Ei! Meviteni anatin navong mevit kotisa suval koan Sameria tai ka ninin tisa tai mul enuk.”

⁴⁹Ka Iesu vit kesi vit, “Ninin tisa tovuol enau. Inau navouhou min Tata onak, ka kami mirvouhoutei minau.

⁵⁰Narsak vistei mahou lat isok vahina nesa. Ka tai mul koa en vati vahou lat isok, ka kei helei rahit usite onami.

⁵¹Naviteni anatin min kami keke koakeil along kat hihiseien keil onak irvatei en matien en avong etai.”

⁵²Siu keil aviteni mini avit, “Ekek, mekilea revi keke ninin tisa mul enuk. Ven Ebraham mat, ka provet keil emun onen Ahi umatmat. Ka keik komul koviteni keke koakeil along kat hihiseien keil onom irvatei en matien en avong etai.

⁵³?Mukave? ?Komul koviteni keke kovi hetetamen imok mulin avu Ebraham koa mat? ?Ka mukave en provet keil? ?Komul koviteni keke kovi hetetamen imok mulin keil, veni keil emun umat? ?Keik komul koviteni keke kovi isei varei?”

⁵⁴Iesu vit kesi vit, “Munak inau navou lat sasok en isok, eis koanek hehi heisav enges. Ka vi Tata onak koa mul vou lat isok. Kami miviteni mivit kei vi Ahi onami,

⁵⁵ka mireingeingen kei. Ka inau nakilea, ka nasakras maliluvos mahit nareingeingeni. Veni vamukonek mahi uti luvosien vasuval kami. Anatin, inau nakilea, ka namul nalong kat selusien keil onen.

⁵⁶Ebraham, avu onami, kei mundem kilea keke avong onak hekistal, ka si kei houlu veni.”