Joni 8:30-56

³⁰Anagema nehige'za rama'a vahe'mo'za Agrite zamentinti hu'naze.

³¹Jisasi'a, Jiu vahe zamentinti hu'namokizmia amanage huno zamasmi'ne, Nanekeni'a miko knama erizafa huvava hanuta, tamagra Nagri namage ante disaipol naga manigahaze.

³²Ana nehutma tamagra tamage naneke antahisnageno, ana tamage nanekemo katufe tmantegahie.

³³Zamagra kenona'a anage hu'naze, tagra Abrahamu agehete, magore huta mago netera kazokzo eri'zana e'ori'none, Kagra nahigenka katufe tmantesageta amne vugahaze hunka nehane?

³⁴Jisasi'a anage huno zamasmi'ne, tamagerafa hu'na tamagrira nermasmue, maka kumi'ma nehza vahe'mo'za kumi'mofo kazokzo vahe mani'naze.

³⁵Kazokzo vahe'mo'a nompina manivava nosie, hanki mofavremoke nompina manivava nehie.

³⁶E'inahigu Nemofo'ma katufe tmantena knare hutma mani so'e hugahaze.

³⁷Nagra antahi'noe, tamagra Abrahamu ageheta mani'nazanagi' Nagri nahe frinaku kanku nehakaze, na'ankure Nagri nanekemo'a tamagri tamagu'afina omne'ne.

³⁸Nagrama kema nehuana, Nenfa'ene mani'nena ke'noa zanku neramasmue, tamagrama nehazana neramafampinti'ma antahinazaza nehaze.

³⁹Zamagra kenona'a Jisasina anage hu'za asmi'naze, Abrahamu'a tagri nerfa'e, Jisasi'a anage huno zamasmi'ne, a'o, tamagra ma Abrahamu mofavrema mani'nenutma Abrahamu hu'nesia avu'ava hugahaze.

⁴⁰Nagra tamage naneke Anumza'mofompinti antahi'noa ke neramasmue, hianagi Nagrira nahe'za nehaze. Abrahamu'a e'inahura osu'neaza tamagra hunaku nehaze.

⁴¹Tamagra neramafa avesiza nehaze. Zamagra kenona'a anage hu'naze, tagra savri avu'avatetira fore osu'none, tagrira magoke Nerfa, Anumzana Agrake mani'ne.

⁴²Jisasi'a anage huno zamagrira zamasmi'ne, Anumzamo'ma tmagri nerfa'ma mani'neasiana, tamagra Nagrira navesi nantasine, na'ankure Nagra efore hu'noana, Anumzamo hunantege'na e'noe. Nagrani'a navesitera ome'noe, hagi Anumzamo hunantege'na e'noe.

⁴³Nahigeta kema hua nanekea antahi amara nosaze? Na'ankure Nagrama hua nanekea antahi ama nosazagu, ana nehaze.

⁴⁴Tamagra Sata mofavre naga mani'naze, ana hunetma nermafa'ma avenesia avu'avaza nehaze. Ese agafare vahe ahe fri'nea ne' mani'neno, tamage nanekemofona amage nonte. Na'ankure tamage kea agripina omne'ne. Kema hifina, havigege nehie, agra avu'ava zanku kea nehie. Na'ankure havige ne' mani'neno, havigemofo nefa'e.

⁴⁵Hianagi na'ankure Nagra tamage nehugetma, tamagra nanekeni'arera tamentintia nosaze.

⁴⁶Amama, mani'nafitira izaga Nagrikura kumi hu'ne hunka nanekea hunantegahane? Nagrama tamage nehusugetma, nahnigetma tamentintia osugahaze?

⁴⁷Aza'o Anumzamofo naga mani'nenimo'a, Anumzamofo naneke nentahie, ama'na agafare tamagra nontahize. Na'ankure tamagra Anumzamofo nagara omni'naze.

⁴⁸Jiu vahe'mo'za anage hu'za kenona'a asmi'naze, hufatgo huta negasmune, Kagra Sameria vahe mani'nankeno hankromo kagu'afi fre'nefi?

⁴⁹Jisasi'a anage huno kenona hu'ne, Nagrira nagu'afina hankrora omni'ne, hianagi Nagra Nenfa ra agi nemugetma, tamagra Nagrira nazeri fenka nenatra'ze.

⁵⁰Nagra ra nagi erinakura nosuanki, Anumzamo Nagri nagi'a eri ra nehuno, naneketi refko hurantegahie.

⁵¹Tamagerfa hu'na neramasmue, Keni'a nentahimo'a, agra ofrigahie.

⁵²Jiu vahe'mo'za Jisasinku anage hu'za asami'naze, menina tagra antahi'none, hankromo kagu'afi mani'ne. Abrahamu'a fri'negeno, kasnampa vahe'mo'zanena anazanke hu'za fri'nazagenka, Kagra anage nehane, iza'o nanekeni'a avariri simo'a, agra ofrigahie hunka nehane.

⁵³Abrahamu nerfa'a ko fri'neanki, Kagra agtere'nano? Kasnampa vahera ko fri'nazanki! Kagra kagesa antahinana aza'ne hunka nehane?

⁵⁴Jisasi'a anage huno zamasmine, Nagra nagi erira hanuana, ana Nagimo'a amnezasegahie. Hianagi Nenfa'a Nagri nagi erira nehigeta, Agrikura tamagra hutma, Agra, tagri Anumzane nehaze.

⁵⁵Tamagra Agrira antahinomize, hianagi Nagra antahi'na ke'na Agrira hu'noe, hankina Nagrama hu'na, Agrira antahi'na kena osu'noe hanuana, havige hu'na tmagrikna hugahue, hianagi Nagra Anumzamofona antahina kena hu'nena, ke'a erizafa nehue.

⁵⁶Neramafa Abrahamu'a Nagri kna kenaku muse nehuno, keteno tusi'a muse hu'ne.