San Juan 8:30-56

³⁰Chi rëb Jesús zian, zien ree bejn bililadx laaman.

³¹Rëb Jesús loj ree bén Israel bililadx laaman: ―Bal gusnuu guzoobidi da diidxan, waliqui najdi da bejnan,

³²abiꞌ züjnbeedi conin na̱j diidxli, abiꞌ por diidxli guin zalaadi.

³³Badxiꞌ reeman laan rëb reeman: ―Dunujn zioꞌp loj xdiaa Abraham, abiꞌ ad yuꞌt dxej wayajcan ziꞌc bén nadoꞌ. ¿Chexquiza zeel nal du lojn, guial por diidxli zalaan?

³⁴Dxel rëbaman loj reeman: ―Diidxli rnin lojdi, guial graczi bén rüjn ganaxzi dol, laa reeman na̱j ziꞌc bén nadoꞌ loj dol.

³⁵Abiꞌ tijb bén nadoꞌ loj bejn, ad zileꞌt guiëbaman xfamilaman na̱j xpatronman, saꞌn xiꞌn patron guin zileꞌ guiëbix xfamilixan.

³⁶Zeel bal Xiꞌnman guslaa lëjt, ad najtridi ziꞌc bén nadoꞌ.

³⁷Ma qui ragbeen guial loj xdiaa Abraham zëëdidi, per lëjt rën gugüjt naj guial ad rayuladxtidi da diidxan.

³⁸Naj rni ni ma balüü da Dadan naj, saꞌn lëjt rüjndi ziꞌc na xDadidi güündi.

³⁹Badxiꞌ reeman rëb reeman: ―Dux Dadan na̱j Abraham. Dxel rëb Jesús loj reeman: ―Bal niajquidi xiꞌn Abraham, züjndi ziꞌc beenman.

⁴⁰Per yan, majsi ma rnin lëjt diidxli ziꞌc balüü Dios naj, lëjt rëndi gugüjtidi naj. ¡Abiꞌ Abraham ad yuꞌt dxej nüjnman zian!

⁴¹Saꞌn lëjt rüjndi ziꞌcgajc rüjn xDadidi. Abiꞌ rëb reeman loj Jesús: ―Dunujn achut mazri xiꞌn nayajcan. Tijbzi Dios na̱j dux Dadan.

⁴²Dxel rëb Jesús loj reeman: ―Bal walidi Dios na̱j xDadidi, guiëndi naj, din por laaman zialan loj guidxliuj. Ad zialtan por naj gajc, zialan por Dios bén guxhaal naj.

⁴³Abiꞌ ad rigniaꞌtidi ni rnin, guial ad rëntidi gucaagdiajguidi da diidxan.

⁴⁴XDadidi na̱j xindxab, abiꞌ rüjndi ziꞌc rënx güündi, din diizd yaloj ruladx xindxab guin gugüjtix bejn. Ad yuꞌt dxej chinalix ni na̱j diidxli, din ad rnieetix diidxli. Chi rnieex diidx rusquiee, achet naladxix, din laax na̱j xin rusquiee na̱j tëëx xdad guialrusquiee.

⁴⁵Per guial naj rni lëjt ganax diidxli, ad rliladxtidi naj.

⁴⁶¿Chu lëjt zajc na guial yuꞌ xhie dol ma benan? Abiꞌ bal diidxli na̱j ni canen, ¿chexquiza zeel ad rliladxtidi naj?

⁴⁷Bén na̱j xbejn Dios rucaagdiajgaman xtiidxaman, per lëjt ad xbejntaman najdi, zeel ad rucaagdiajgtidi xtiidxaman.

⁴⁸Dxel rëb ree bén Israel guin loj Jesús: ―Waliqui ni ranan guial xindxab yuꞌ luxdool na̱j tëël bén Samaria.

⁴⁹Badxiꞌman laan rëbaman: ―Achut xindxab yuꞌ luxdon, naj cuzob xtiidx da Dadan, per lëjt ganax diidxguijdx rnieedi naj.

⁵⁰Naj ad raguiltan guilies ree bejn da valoran, majsi yuꞌ bén rën güün bejn zian, abiꞌ laaman rüjn xguialguxtis.

⁵¹Diidxli rnin lëjt, bén guzoob da diidxan, ad yuꞌt dxej guiëtaman.

⁵²Dxel rëb ree bén Israel guin lojman: ―Yanri ma rayagbeechaawan guial xindxabqui yuꞌ luxdool. Abraham në gra ree bén badëë xtiidx Dios loj ree bejn, güjt reeman, guiáad lüj nal: “Bén guzoob da diidxan, ad yuꞌt dxej guiëtaman.”

⁵³¿Wen mazri lasajquil ya guial loj dux béngulal ree Abraham? Güjtaman, güjt tëë ree bén badëë xtiidx Dios loj ree bejn. ¿Laadx lüj chu naladxil najl?

⁵⁴Abiꞌ rëb Jesús loj reeman: ―Bal naj gajc gales da valoran, achet lasajc ni ganen por naj. Per bén rlies da valoran na̱j da Dadan, bén nagajquidi na̱j xDiosidi.

⁵⁵Lëjt ad nünbeetidi laaman, saꞌn naj nünbeen laaman. Abiꞌ bal ganin ad nünbeetan laaman, nëgajc naj ma na̱j bén rusquiee ziꞌcgajc lëjt. Per nünbeen laaman abiꞌ ruzoban xtiidxaman.

⁵⁶Xbéngulalidi Abraham, babaaman guial guguiaaman dxej ni guialan. Abiꞌ chi baguiaaman dxej guin, mazri babaaman.