Sion 8:1-16

¹Iesu va en Hou Nei Olip ral min meatin keil onen ka amatil ien.

²Out mulan, Iesu va ris en teahu ten Eim Votut. Meatin houlu umai veni ka akarahiti, ka Iesu rondan ka visein keil.

³Navong mul veah vihisei, tiser keil ten mengkatien keil onen Mosis ka Farasi keil amulamun ahin koa avotini matil ral min meatin tai koa rovitei meatin kati onen. Ka asakin ahin enek mulomal en meten meatin keil.

⁴Evus, aviteni min Iesu avit, “Tiser, ahin ekek, navong avotini, mul semau matil ral min meatin tai koa rovitei meatin kati onen.

⁵Mengkatien onen Mosis viteni keke reheov vini ahin keil vatinek. ?Ka keik, koviten sa?”

⁶Keil avis Iesu mukok keke akilea avahuli kati ven selusien onen. Ka Iesu malingling, ka mutis tounah tai en atan ral min kalihen.

⁷Ka keil amules avisi vasa kes hihiseien one. Sakini, mulomal ka viteni min keil vit, “Isei en kami koa romumontei tounah vatisa, kei varei heov rohtoh eni.”

⁸Evus, malingling eris, ka mutis tounah tamun en atan.

⁹Navong tiser keil ten mengkatien onen Mosis ka Farasi keil alonge mukok, tetai en keil vasi uva. Koakeil amatu uva mulamu, tai evus, tamun va vio … Iesu kei sasen ro, ka ahin enek mul veah mulomal en meten.

¹⁰Evus, Iesu mea mulomal ka viteni mini vit, “?Ahin, meatin keil uva kave? ?Mukave? ?Tovuol en keil vato vahit kimat ven tisaen onom?”

¹¹Ahin vit kesi vit, “Asuv, meatin tovuol.” Ka Iesu viteni mini vit, “Hesakini, inau mun nirvitentei keke kikur etai mahien. Ka kiha ris teim, ka kosa heha, konoumtei mun natisa.”

¹²Navong Iesu mul veah en teahu ten Eim Votut, selus eris min meatin keil vit, “Inau navi meneai en out netan koa ritin luvat rendemien onen meatin keil. Ka meatin koa mul musil inau hermualtei en mankoli, veni meneai koa hel ien hetitin luvat sise ten moulien mini.”

¹³Farasi keil koa alonge aviteni mini avit, “Keik kos komules koselus en usite onom. Sakini, mesakras mevakur anatin en selusien onom.”

¹⁴Iesu vit kesi vit, “Anatin keke namul naselus en usite onak. Ka asa koa naviteni anatin veni nakilea out kave naka ien, ka nakilea out koa niha ien. Ka kami mireingeingen out kave naka ien vuo out kave niha ien.

¹⁵Navong kami milei rahit en usite onak, mimusil rendemien onen meatin keil enges ten out netan. Ka inau, narmultei malei rahit usite onen meatin keil.

¹⁶Ka avaseini munak nilei rahit usite onen meatin tai, asa koa nihiteni hehi anatin. Veni rovitei inau sasok koa namumoni, ka inau komal Tata onak koa sila inau namita mellei rahit vituai eni.