Johannes 8:1-16

¹Mürin ekewe aramas ra feila lon en me lenian, nge Jesus a feitä won ewe Chukun Olif.

²Lesosorusichin sorotän ewe rän a liwinsefäliti ewe imwenfel. Iwe, ekewe aramas meinisin ra mwicheto ren, nge Jesus a mottiu o popuetä le afalafaleer.

³Iwe, ekewe Sensen Allük me ekewe Farisi ra etekinato eman fefin ra sereni lon an lisowu. Ra aütai ewe fefin me mwen meser meinisin

⁴o üreni Jesus, “Äm aia sereni ei fefin lon an lisowu.

⁵Lon Allükün ach lamalam, Moses a allük pwe ei sokun fefin aramas repwe mone ngeni fau tori an epwe mäla. Nge met en kopwe apasa usun ei fefin?”

⁶Ra apasa ei fän iten ar repwe särei Jesus, pwe epwe wor och mine repwe tongeni aturu won. Nge Jesus a pworotiu o makkei won ewe pwül ren aütün pöün.

⁷Iwe, lupwen ra ükütä ikenan o kapas ais ngeni, Jesus a wenetä o üreniir, “Iön leimi esap wor an tipis epwe akom le monei ei fefin ngeni aeföün fau.”

⁸Mürin a pworesefälitiu o makkei won ewe pwül.

⁹Iwe, lupwen ar rong ekei kapas, ra chök feila eman mürin eman, nge ekewe chinlap ra akom. Iwe, Jesus chök a nom ikenan, pwal ewe fefin mi ükütä ren.

¹⁰Jesus a wenetä o üreni ewe fefin, “Ikafa ir ekewe mwän? Esap chüen wor eman a nom an epwe apwünguk ngeni mäla?”

¹¹Ewe fefin a pölüeni, “Ai samol, esap chüen wor eman leir a nom.” Mürin Jesus a üra, “Üsap pwal fokun apwünguk. Kopwe feila, nge kosap chüen föri tipis.”

¹²Iwe, Jesus a kapassefäl ngeni ekewe aramas o üreniir, “Ngang ewe saramen fanüfan. Iö a tapweto müri epwe eäni ewe saramen manau, nge esap fetal lon rochopwak.”

¹³Iei mine ekewe Farisi ra üreni, “Ka eäni kapasen pwärätä usun püsin en, nge om pwärätä esap pwüng.”

¹⁴Jesus a pölüeniir, “Inamwo are üa pwärätä usun püsin ngang, nge ai pwärätä a pwüng, pun üa silei ia üa feito me ie o ia üpwe feila ie. Nge ämi ousap silei ia üa feito me ie are ia üpwe feila ie.

¹⁵Ämi oua eäni apwüng lon örünien aramas. Ngang üsap apwüngü eman.

¹⁶Nge are üpwe apwüngü eman, ai apwüng epwe let, pun ngang üsap aleman chök lon, pwe ewe Sam mi tinieito a etiei.