Juan 8:1-16

¹Meneng dimoton si Jesus te bontod iningedanan Olibo.

²Keeldawan niyan te peglibtak te aldaw, limikò si Jesus doton te dakel simbahan. Pegketipon te kedita te otaw, nenenoo sikandin aw migtoladà kandan.

³Dalem te pegtoladà din, dimateng se menge menenoladà te punù ingkeliwat i Moises aw menge Parisiyo. Inibing dan se sebad bayi kinità dan limakad. Inibing dan sikandin doton te monà i Jesus

⁴aw minikagi dan, “Sir, kinità day gina se bayi seini limakad.

⁵Doen punù ingkeliwat i Moises te keilangan bontogan te bato se otaw limakad amon matay. Na, menonen lay sikandin. Eden lay se aneng-aneng nikaw?”

⁶Yan se ininsà dan amon tendaen dan si Jesus, so ibeg dan idimanda dan sikandin diyà te howis. Meneng timibakang sikandin aw simolat te intetodò din diyà te tanà.

⁷Sagwa wedà dan lengà te peg-insà dan kandin, timindeg si Jesus aw minikagi, “Se otaw diyà kenyo wedad palos salà ininang din, yan se mekeonà memontog kandin te bato.”

⁸Penga niyan, todà timibakang si Jesus, aw simolat te intetodò din kidoen te tanà.

⁹Pegdineg te menge Parisiyo te inikagi din, neyàyà dan aw nesayo se kedita dan teg sebad-sebad. Menge obanen se onà nesayo. Nesamà olò se bayi aw si Jesus.

¹⁰Penga niyan, timindeg si Jesus aw mig-insà, “Atà, kenan lay den se menge otaw neopal kamno? Wedad lay den migpelumun kamno?”

¹¹Timaba se bayi, “Wedad, Sir.” Minikagi si Jesus, “Eked a heman pegpelumun kamno. Olì ka den, aw ikà todà egpekesalà.”

¹²Pegtoladà i Jesus te menge otaw netipon, minikagi, “Siaken se kelowahan eg-anyag diyà te kedita te otaw te keneyonan. Aw tomaking se otaw kanak, wedad kengitngit diyà te pedowan din, so doen keanyag diyà kandin mekebegay te kaling pedowan wedad temanan.”

¹³Pegdineg te menge Parisiyo te inikagi din, minikagi dan, “Olò sebad no se mig-indan kenami tepad te kamno pegkeotawun. Eked kepemenali se inikagi nikaw.”

¹⁴Timaba si Jesus, “Pengkey olò sebad ko se mig-indan tepad kanak, meneng benal se inikagi ko, so netegahan ko aw kenan a lekat, aw netegahan ko heman aw kenan a pesalo. Meneng sikiyo, wedà kaw ketaga-taga aw kenan a lekat aw kenan a pesalo.

¹⁵Aw meg-okom kaw te otaw, lekat olò te kenyo aneng-aneng se peg-okom niyo. Meneng siak, kenà tod ko dini se peg-okom ko te otaw.

¹⁶Meneng aw meg-okom a, keseligan se peg-okom ko, so kenà ko sidebok se meg-okom, meneng meg-okom kay te Amay ko simogò kanak.