Santiago 3:3-9

³Cha geru gbamai ñachugeda ai kare bage ba ta gbe geru che gerule giti: Che chage ja giti che takalin ja age ulita che takalin kare gire che kle giska gbe ja kate ene che ñage ja dbe baini kaire che takalin ja joge ngwadi. Ulia giska soli agwa che ñage ja jegwale gateda ulita giska e giti.

⁴Che ñage tañachuge kaire agwe du kweri kwian kle chage bleske giti, du e kweri kweri kaire mleuda kle tiennga tanre kira giti kle du e dbe nganake ngnagu gire kwian du dbanga kle du e bliteni gwanaskudani, ama kle du gbe chage lle soli sidri mebi kada timón giti baini kaire ama takalin du joge kare.

⁵E kare ene kaire agwe che kle boi che kwira ole. Ulia che kwira sidri mebi agwa che kwira giti che kle mo gbe gerule gweale me no diali, che gerua giti che kle mo gbe jiske tanre Chube gwa giti. Che kwira salengwli jita kare. Jita tan soli sidri mebi giti che ñage nga bataba kweri guge ulita kaire ñage gli kweri guge ulita ni che ñage jita gweda.

⁶E kare ene che kwira giti che kle gerule tanre me no daba nadi ene che kle chege jiske tanre Chube gwa giti che gerua e kbiale. Che dolla Satanás kle che ta gbe gerule me no diali, che kle gerule me no giti che agali kle boi daga ngwale che kle chage toi gwade gire, kaire che kle gerule me no giti che kle daba gbe boi daga ngwale, daba chege skochie diali che gerudu giti. Lle ulita kle joge me no che kwira kbiale.

⁷Ulia kwian ñage lle bdale tanre kle toi ngaske gbe anleda, bda ko giti, bda ji giti, bda chage dba kde kwara giti, lle ngwere toinga chiske, lle bdale e kare ulita kwian ñage gbe anleda.

⁸Agwa ni kwian gdaite ñage mo kwira gbe ngwedi diali me gerule ni geru gbaite me no daba nadi. Chui gwealege kwian ulita kle mo chuge ngwadi gerule me no dabadi, kwian gerule giti kwian kle daba gbe boi tanre daga ngwale tirare salengwli jorisi age kwian ole kare. Jorisige kwian lentige kare, ene kwian daba gbe boi dagale gerule me no dabadi giti.

⁹Che kwira giti che kle gerule no che Ñenua Chube che Chugagwalla giti kaire che kle mo gate ama giti. Agwa kaire che kwira e amaña giti che kle gerule me no dabadi, ni che kle tañachuge Chube kwian ulita dodadu mau kare, gire che kle gerule me no kwian edige.