SAN MARCOS 7:3-17

³(Jamé ixin cain xifariseo co icha chojni Israel anto vaguitticaon na co vanchehe na costumbré cain ndogoelitoe na ẍanc̈hjen are icha saho. Rroc̈ho que cainxin tiempo vacontti na jinda rá na tsje nttiha saho de vane na.

⁴Co are vaquixin na ndásin co si vaconttiha na jinda rá na tsje nttiha saho, vajineha na. Cai vechonda na tsje costumbre icha, inchin queẍén vacjén na taza co chi co traste de chia co saoen na.)

⁵Cottimeja joanchiangui na ngain Jesús co ndac̈ho na: ―¿Quedonda chojni que c̈hjiho ditticaonha na costumbré ndogoelitoa na ẍanchjen? Ixin jehe na tonttiha na jinda tsje nttiha saho que jine na.

⁶Cottimeja Jesús ndac̈ho ngain na: ―¡Jaha ra chojni que ncheha inchin ndac̈ho! Mexinxin nchao diquentaxin Isaías janhi de ixin jaha ra: Chojni tehe nchesayana na conixin rroha na, pero ngain ansén na ẍa icjin te na para sinao na na janha.

⁷Mexinxin ẍonhi ẍé masqui tenchecoanxinna na ixin tti jehe na tenchecoenhe na chojni joxon tti ttetonha xí nttihi ngataha nontte.

⁸Jihi ndoa de ixin jaha ra ixin jaha ra ditticaonha ra tti ttetonha Dios sino que nchehe ra inchin ndac̈ho costumbré ndogoelitoa ra ẍanc̈hjen. Rroc̈ho costumbre de queẍén ttjén ra vaso co chi co icha costumbre inchin mé.

⁹Co Jesús ndac̈ho ngain na cai: ―Jaha ra coín ra ná lado tti ttetonha Dios para nchao nchehe ra inchin ndac̈ho costumbrea ra.

¹⁰Ixin ley que vayé Moisés ndac̈ho: “Ttjiho ra respeto ngain ndodá ra co ngain janná ra”, co “Tti rronichja jianha ngain ndodé o ngain janné, chojni mé jiquininxin ndasenhe.”

¹¹Pero jaha ra ndac̈ho ra ixin ná chojni nchao rrondache ndodé o janné: “Janha c̈hoha tsjenguijna soixin ixin cain tti janha chonda, mé Corbán” (co jihi rroc̈ho ixin jehe ojoanjo cain mé ngain Dios).

¹²Co si ná chojni ndac̈ho jañá, jaha ra itanc̈hjandaha ra para tsjenguijna ndodé o janné.

¹³Co jañá jaha ra incheha ra caso tti ttetonha Dios, sino que jeho nchehe ra inchin costumbre que vayehe ra de ngain ndogoelitoa ra co tti jaha ra nchecoenhe ra xanha ra jai. Co nchehe ra icha cosa jianha inchin jihi cai.

¹⁴Cottimeja Jesús nichjé cainxin chojni iná co ndac̈ho ngain na: ―Ttinhi ra jian cainxin tti janha rrondac̈hjan co ttinxin ra.

¹⁵Jeha tti jine chojni nchejianha na. Tti ttixin ansén chojni, mé tti nchejianha chojni.

¹⁶Jaha ra que ttinxin ra, ttinhi ra jian.

¹⁷Cottimeja Jesús cjan sajoixinhi nchia, co are Jesús ngaxinhi nchia, chojni que vacao Jesús joanchiangui na ngain jehe ixin quehe rroc̈ho ejemplo mé.