Mareko 7:3-17

³Paana Parisea tataodi, eo Iudea tataodi gamagaridi urutubu laulaudi se nanabuedi, aiai nige se ai gaibu mo, se nimadeuri baguna.

⁴Edi aba uneune eai isi se uioma ena nige se heaauioidi aiai nige se ai: laulau gamagaridi hinage isi se nanabuedi ina doha, bia, eo gulewa, eo bianomnom udoi, isi se deuridi.

⁵Parisea tataodi, eo tauuriuri tataodi se hesiolau ia arinai si ene, “Em heaheatayao urutubu laulaudi se saha nige se nanabuedi, isi adi aiai se aidi mo, nige se nimadeuri?”

⁶Ia i heuio, ie ribalau aridi eai, i ene, “Omi tatao boraborasom, Isaia i heaheasoniemiu, doha ie uri, i ene, ‘Isi awadi eai mo se aihelahuigu, isi nuadi eai se tausuaraegu.

⁷Isi edi aihelahuigu nige ana ao, tatao edi laugagaeo mo se heaheatadi.’ (Isa. 29.13).

⁸Eaubada ena laugagaeo au torehesuaradi, tatao edi laugagaeo mo au abididinidi; eo ginauri gamagaridi nei doha au abiwataidi.’”

⁹Ia i ribalau isi aridi eai, i ene, “Taiede, Eaubada ena laugagaeo au otaotaedi bena urutubumiu edi laugagaeo au sogohidi.

¹⁰Mose i ribaeyao, i ene, ‘Tamam eo sinam u gigihebigadi’: (Ex. 20.12). eo i ene, ‘Esau tamana eo sinana ie ribahebaaeadi abo se unuhemate’: (Ex. 20.17).

¹¹Omi emi ribaribana, au ene, ‘Ena tau ie ribalau tamana e sinana arinai i ene, Koban, ia ede ainauia, egu gadosisi, eo egu heasisi, eo egu gogo gamagari ea mosei Eaubada arinai, ea ainauiai’:

¹²Au ene taba tamana e sinana ia nige ie gigihebigadi, taiede, i lolo hinage.

¹³Omi ina doha urutubumiu mo edi laulau au abiwataidi, eo Eaubada ena riba au talaoriori: laulau gamagaridi ina doha au nanabuedi.”

¹⁴Moutuana wa i eogaidi se laoma ia arinai, abo ie ribalau isi aridi eai, i ene, “Omi gamagarimiu egu riba au ataiei, eo au nuatui:

¹⁵Ginauri ina murimuri eai ta, tau ie domdi bogana alona eai ia nige se hebii; boeana eai se laoma temeta mo tau abo se hebii.

¹⁶Ia beana eai i ataiei ia abo i ataiedidini.”

¹⁷Ia abo i awasae numa alona eai moutuana wa i laugabaedi, ena heaheatayao parabole ta teina se oimuriei ia arinai.