San Lucas 9:27-36

²⁷Watcha kaiznamtus. Mɨnpazha akki uztuzpain iamanazi, miza Dios awaruza ɨninnamtu piankamanakima.

²⁸Ocho payu pailtawane, Jesúsne Pedrorakas Juantakas Santiagorakas ɨnkal ɨzara minara, Diosta paikwan.

²⁹Diosta paikuamtuasmin, Jesúspa matsɨh naztam malkwera. Paiña kwaksham putchãkana namtɨt.

³⁰Suane Moiséskas Elíaskas, paas an ñancha uzattuzkas, uskasa kwinta kiilta.

³¹Sun paasas Jesús panakin naztam malkwera. Uspane Jesús irɨmtu Jerusalén pɨpulura kwinta kiilta.

³²Pedrokas paiña izmuruzkas pitshiara. Izkularawane, uspane Jesús naztam namtɨt izara. Paas awarakas Jesúskasa panara izara.

³³Paas ampu Jesústas ɨmtazasmin, Pedrone Jesústa ka kaizta: —Kamtam, watmin akki tumakpas. Kutña ɨranchu sanawas: mazane nu akwa, mazane Moisés akwa, mazane Elías akwa, kizta. Pedrone us kwinta kit aizpa pianchi.

³⁴Sun kwinta kimtuasmin, wanish usparuza sɨpnara. Wanish usparuza sɨptane, izmuruzne ishkuara.

³⁵Diosne wanish ayukmalsɨh ka kiznara: “Anne ap painkul i. Ussa narau. Ussa mɨrain,” kiznara.

³⁶Dios kaizta aizpa mɨarawane, uspane Jesústa mazainpain pana izara. Uspane puñain paat kit uspa izara aizpa kainanarachi. Akkwan payurakima mɨnainkas izara aizpa kaiznarachi.