San Lucas 2:6-10

⁶Ndö vaa ꞌnan tui: viochen xjen na mꞌanhan joꞌ, tueeꞌ xjen na ntsingui María.

⁷Ndoꞌ singui jon jnda jon na vejndyee, yusꞌahin. Scüetyjo jon ndiaahin, ndë joꞌ tyio jonhin naijon na cocüaꞌ quiooꞌ ngꞌe ntꞌaa naijon na veꞌ cotsque ya nnꞌan, tooꞌchenhanꞌ na mꞌan nnꞌan.

⁸Ndyo tsjoon Belén, tomꞌan nnꞌan tojndëë na totaꞌntyjeeꞌhan quinman njnuenꞌ natsjon.

⁹Ndoꞌ ninjonto tityincyooꞌ ncüii ángel cüentaaꞌ ta Tyoꞌtsꞌon ndëëhan, ndoꞌ juu naquixuee na conduihin, sixueehanꞌ xiꞌjndio nanꞌñeen, ndoꞌ na tui na nndaꞌ, sꞌaahanꞌ na ncyaa jndyihan.

¹⁰Majoꞌ juu ángelꞌñeen tso jon ndëëhan: —Tyiꞌndyuehoꞌ, quitquenhoꞌ cüenta, ndyoyꞌön jñꞌoon na ya jndyihanꞌ ndëëhoꞌ na nninncyaahanꞌ na neiinꞌ jndyi nꞌon nnꞌan na ninvaa tsonnangue.