SAN LUCAS 22:14-60

¹⁴Ihcuac oahsic in horas, in Jesús huan in tetiotlatitlaniluan omotlaliloc inahuac in mesa.

¹⁵Oncan Jesús oquiniluiloc: ―Molui onicnec tictlaolichtisque inin iluitlacuali den pascua achto ic nimiquis.

¹⁶Tleca namechiluiya ahmo oc sepa nicchihuas hasta ihcuac matzonquisa ipan tetlatequiutilistzin Dios.

¹⁷Oncan omoan inon vaso den uvahtlayili huan omotlasohcamatiloc huan omihto: ―Xicanacan inin huan ximoxehxeluican.

¹⁸Tleca namechiluiya ahmo oc sepa niconis de inin uvahtlayili hasta ic hualahsis in tetlatequiutilistzin Dios.

¹⁹Oncan omoan in pantzin huan omotlasohcamatiloc huan omoxehxeluihque huan omoluihque: ―Inin yeh notlacayo tlen namechmactiliyahque. Ijcon xictlaolichtican ica nehhua.

²⁰Noyojqui ijcon omochiu ica in vaso satepa den iluitlacuali. Huan omihto: ―Inin vaso den uvahtlayili yehhuatl in noyes tlen mochayahua ica namehhuan, huan yehhua in tlen ic moteixmatiltiya melahuac ica inin yancuic mononotzalistli.

²¹’Huan axan nica tohuan tlacua in aquin nechtemactis.

²²Huan nehhua aquin Nitetiachicau ica nochin tlacatl nimiquis quen ca tlahcuiloli. ¡Huan tetlocolti in aquin nechtemactiya!

²³Oncan opeuque motlahtlaniyahque ic yehhuan aquin inon yes in tlatemactiyani.

²⁴Huan niman opeuque motlatlaxiliyahque ica yehhuan aquin ocachi hueyixtoc mochihuas.

²⁵Huan Jesús oquiniluiloc: ―In hueyixtoque den tlalticpactli tlatequiutiyahque quen tetatahmen huan quinmahuestiliyahque in achtohque de yehhuan.

²⁶Huan namehhuan ahmo ijcon nanquichihuasque. Oc noncua in aquin ocachi nanquimahuestilisque ic namehhuan quipiya tlen mochihuas ocachi ahmo tlen iquisca. Huan in aquin tlatequiutiya quipiya tlen mochihuas quen in aquin tlapalehuiya.

²⁷Tel, ¿aquin in ocachi quimahuestilisque? ¿In aquin motlalis tlacuas, noso in aquin tlapalehuiya? Tel, ¿ahmo ijcon melahuac quimahuestilisque in aquin ca iixpa in mesa? Huan nehhuatl no nica namohuan quen in aquin tlapalehuiya.

²⁸’Namehhuan in aquin nochipa nohuan onancatcahque ic nanquitemactisque notequiu, masque onechmachilihque.

²⁹Huan ic inon namechchihua quen tequihua ijcon quen Nohueyitahtzin onechchihualo,

³⁰ic titlacuasque huan tiatlisque sansecnin ompa ihcuac nitlatequiutiya. Huan namechmacas in hueyilistli ic nantlixcomacasque ica in mahtlactli huan ome ololi den Israel.

³¹Noyojqui omihto in Totecohtzin: ―Simón, Simón, xicchihua cuenta quen in ahmo cuali tlacatl mechtlahtlantoc ic mechyoltilanas ic xinechyolilcahuacan.

³²Huan nehhua nimotlaitlanihtoc ica tehhua ic ahmo mamitzpolo motlaneltoquilis. Huan tehhuatl, ihcuac timoyolcuepas ica nehhua, xiquinyolchicahua in mocnihuan.

³³In Simón omoluic in Jesús: ―Notecohtzin, nimotemacatoc ic niyas tehuan in telpiloyan huan hasta canin micohuas noyojqui.

³⁴Jesús oquiluiloc: ―Pedro; nimitziluiya yeh in axan achto ic tzahtzis in pachilel, tehhuatl tinechixtlatis yexpa.

³⁵Oncan Jesús oquiniluiloc in tetlamachticahuan: ―Ihcuac onamechtitlan iyoca, niyan bolsa, niyan in tlen ipan moehua in tomin, niyan tecactli; tel, ¿omechpolo itlahtlen? Yehhuan oquihtohque: ―Ahmo.

³⁶Oncan oquiniluiloc: ―Tel, axan in aquin quipiya bolsa maquihuica, noyojqui in aquin quipiya in tlen ipan quiehua in tomin. Huan in aquin ahmo quipiya in espada, maquinemaca icóton huan maquicohua.

³⁷Tleca namechiluiya quipiya tlen tzonquisas ica nehhua, quen quihtohua in Itlahcuiloltzin: “Huan otetlahtlacoltihque ica in oc sequin ahmo cualten.” Tleca nochin in tlen ca tlahcuiloli ica nehhua quipiya tlen tzonquisas.

³⁸Oncan yehhuan oteiluihque: ―Totecohtzin, nicanca in ome espadas. Huan Yehhuatzin omonanquilihque: ―San ic inon.

³⁹Oncan Jesús oquixohuac huan ohuilohuac ipan in tepetl Olivos quen saniman mochihua. Huan otecuitlapanuihque in tetlamachticahuan.

⁴⁰Ihcuac oahxihuato ompa, oquiniluiloc: ―Ximoyolmachtican ic ahmo mamechyolquitzqui in ahmo cuali.

⁴¹Niman in Jesús ohuilohuac ocachi ompic de yehhuanten cana quen ic huehca motohuetzohua in tetl, huan ompa omotlancuaquetzaloc ic omoyolmachtiloc.

⁴²Huan omihto: ―Nohueyitahtzin, tla monequi, nechmaquixtilos ic nitlapanos; ahmo maye ica nehhua notlanequilis, tlahmo ica Tehhuatzin.

⁴³Oncan otemonextili se ángel den neluicac ic techicahuas.

⁴⁴Huan ic tequin otlapanoloticatca, omoyolmachtiloc ocachi chicahuac. Huan in teitonil ochopinticatca quen yestli tlalpa.

⁴⁵Ihcuac otlan moyolmachtilo ohuilohuac moahsihque in tetlamachticahuan. Quen otlocoxque, omahsitohque cochtoque.

⁴⁶Oncan oquiniluiloc: ―Tel, ¿tleca nancochticaten? Ximehuacan huan ximoyolmachtican ic ahmo mamechyolquitzqui in ahmo cuali.

⁴⁷In Jesús queman oc omononotzticatcahque ihcuac oahsicohque miyac tlacamen. Inon Judas, yehhuatl inon seya den mahtlactli huan ome tetlamachticahuan, huan yehhua oquis ihcuac ocatca in tlacuali den tlaolichtilistli. Yehhuatl inon in tlayecanqui huan omopacho ic otepipitzo in Jesús.

⁴⁸Oncan Jesús omoluic: ―Judas, tel, ¿ic tinechpihpitzohua, tinechtemactiya nehhua aquin Nitetiachicau ica nochin tlacatl?

⁴⁹In aquin tehuan ocatcahque in Jesús oquitaque tlen opanoticatca, huan otetlahtlanihque: ―Totecohtzin, tel, ¿tiquinmacasque ica in espada?

⁵⁰Huan se de yehhuan oquinacastehtec ic iyejcan in itlaquehual in hueyixtoc den tiopixcamen.

⁵¹Huan Jesús omihto: ―Xiquincahuacan, san ic inon. Oncan Jesús omomachili inacas inon tlaquehuali huan omopahti.

⁵²Niman omoluihque in achtohque den tiopixcamen huan in tlixpiyanimen den tiopan huan in tetecten, inohque aquin tehuicanihque: ―Tel, ¿onanualejque namehhuan ica espadas huan cohuitl quen niyesquiyani niichtejqui?

⁵³Ihcuac namohuan onicatca mostli ipan in tiopantli, niyan onannechquitzquihque. Huan axan inin namotonal, ihcuac mechtequiutiya in ichicahualis in ahmo cuali tlacatl.

⁵⁴Ihcuac otequitzquihque in Jesús, huan otehuicaque tlatemactili ichan in hueyixtoc den tiopixcamen. Huan Pedro otecuitlapanuiyaya san huehca.

⁵⁵Huan ompa oquitlalihque se tletl tlanepantla den quiahuactli. Huan ompa oquiyehualuihque inon tletl. Huan Pedro noyojqui ompa inuan omotlali.

⁵⁶Oncan se tesqui ic oquitac ompa oyehuatoya, oquitzticatca huan oquihto: ―Noyojqui inin tlacatl ihuan onemiyaya in Jesús.

⁵⁷In Pedro ahmo omocuiti huan oquihto: ―Sihuatl, nehhuatl ahmo niquixmati.

⁵⁸Satepa oquitac oc seya huan oquiluic: ―Tehhuatl noyojqui tipohui inuan. Huan Pedro oquihto: ―Ahmo nehhua, tlacatl.

⁵⁹Huan cana se hora satepa, oquihtohtehuac oc seya: ―Ic nele, inin tlacatl ihuan ocatca, tleca noyojqui galileahteco.

⁶⁰Oncan Pedro oquihto: ―Tlacatl, ahmo nicmati ica tlen titlahtohtica. Huan ic oc otlahtohticatca in Pedro, otzahtzic in pachilel.