SAN JUAN 9:6-12

⁶A̱stá̱n Jesús li̱lhkómalh ixchújut actzu tíyat y lacahuíli̱lh nac ixlakastapu amá lakatzí̱n.

⁷Xlá li̱ma̱páksi̱lh: ―Capit lakachakaya nac taxtunú ni̱ma̱ huanicán Siloé (jaé tachihuí̱n huamputún: “tí ma̱lakacha̱ncani̱t”).

⁸Amá lakatzí̱n alh lakachaká y tuncán lacahuá̱nalh. Makapitzi tí ixca̱ta̱squihua̱yán y tí ixtalakapasa tzúculh tahuán: ―¿Ni̱ huá jaé lakatzí̱n tí squihua̱yán?

⁹Makapitzi ixtakalhti̱nán: ―Huá namá lakatzí̱n. Y tunu ixtahuán: ―Ni̱ huá, pero na̱ chú tasí. Xlá ca̱huánilh: ―Aquit namá tí li̱chihui̱nampa̱nántit.

¹⁰―¿Niculá tlahuán xlacata tla̱n nalacahua̱nana? ―ixtakalasquiní.

¹¹―Namá chixcú tí huanicán Jesús, laklhkómalh actzu tíyat quilacahuíli̱lh nac quilakastapu y quihuánilh cacalh lakachaká nac taxtunú xla Siloé. Aquit ckaxmátnilh y chí tla̱n clacahua̱nán ―ca̱kálhti̱lh amá chixcú.

¹²―¿Nicu alh namá chixcú? ―takalasquinipá. ―Ni̱ ccatzí ní alh ―kalhtí̱nalh.