Jon 9:6-12

⁶Mewö jiba gölmenöŋ söutköi geiga gwakötak meleŋda jegömöl azigö jeŋe timbiliyök.

⁷Timbiliba kewö jim kutuyök, “Gi mönö Siloam o aŋgönöŋ anda jegi saŋgoŋman.” (Siloam qet mi nanine keunöŋ Melaimelai azi.) Mewö jim kutuiga anda jeŋi saŋgoŋni tohoiga ui asariiga liliŋgöba miriŋe kayök.

⁸Mewö kaiga alaurupŋan kösutŋe malgeri aka tosatŋan mutuk nene yuaigöra ulet eŋgiba mali ekeri, yeŋön i eka jiget, “Jegömöl azi nenegö uleta tata malöhi, yaŋön azi mia me?”

⁹Tosatŋan jiget, “Yaŋön mönö mia.” Tosatŋan jiget, “Qahö, kaisoŋgolomŋi i ewö akzapmö, yaŋön qahö.” Mewö mewö jigetka nanŋak jiyök, “Nöŋön mönö ia akzal.”

¹⁰Mewö jiiga kewö qesiget, “Jegi mönö denöwö aknöŋga tohoza?”

¹¹Qesigetka kewö meleŋ eŋgiyök, “Azi qetŋi Jisös qerakzei, yaŋön söutköi gwakötaknöŋ geiga meleŋda jene timbiliba jim kutuba kewö jiyök, ‘Gi mönö Siloam o aŋgönöŋ anda jegi saŋgoŋman.’ Mewö jiiga o miaŋgöreŋ anda jeni saŋgoŋbi tohoiga ubi asariyök.”

¹²Mewö meleŋ eŋgiiga kewö qesiget, “Azi mi denike malja?” Qesim waŋgigetka “Qahö mötzal,” jiyök. Mewö.