SAN JUAN 7:2-12

²Anatz'äli q'uin ch'uje taj judíosob, jini q'uin ch'uje ta boch'.

³U jitz'inob aj Jesús u yälbijob ca'da: ―Pasen wida cux tä Judea tuba u chänenob a wajcänt'anob ya'iba cua' patan a chen.

⁴Machca yo ubcac cua' u chen, mach mucu u chen u patan. Si ane a chen cua' chichca tuba chäninticba, chen tuba u chänen upete.

⁵U jitz'inob u yälijob ca'da uc'a unejob täcä mach u tz'onä.

⁶Aj Jesús u yälbijob: ―Mach to c'ot q'uin ta xicon. Anelaba u ch'e' xiquetla cachichcamba q'uin.

⁷A'ajtäjob pancab mach u cräxna'tetla. No'onba u cräxna'tanonob uc'a cäle' tu toja cache' mach utz cua' u chenob.

⁸Anelaba cuxla tä q'uin ch'uje. No'onba mach to xon bajca an ni q'uin ch'uje jini uc'a mach to c'ot q'uin xicon.

⁹Cuantu yälbijob ca'da, une coli tä Galilea.

¹⁰Ji'pat que bixi u jitz'inob tä q'uin ch'uje, bixi täcä c'äs mucu, y mach u ye'i uba.

¹¹Aj judíosob cayi u sacänob tan q'uin ch'uje, u yäle'ob ca'da: ―¿Cada wäre an jini winic?

¹²Ni noj q'uenel gente ju'lawjob uc'a u tulaj äle'ob ca'da: “Utz u chen jini winic”. Y otrosjob u yäle'ob ca'da: “Mach une. Ni winic jiniba u sucpecänonla”.