San Juan 6:52-71

⁵²Managuaguat entre sija y Judio sija, ilegñija: Jafa muna usiña este na taotao unaejit ni catneña para utacano?

⁵³Si Jesus pot anão ilegña nu sija: Magajet ya magajet jusangane jamyo: Yaguin ti incano y catnen y Lajin taotao, ya ti inguimen y jâgâña, taya linâlâ guiya jamyo.

⁵⁴Y cumano y catneco, ya jaguimen y jâgâjo, guaja linâlâña taejinecog, ya junacajulo güe gui uttimo na jaane.

⁵⁵Sa y catneco, güiya y magajet na nengcano; ya y jâgâjo, güiya y magajet na guimen.

⁵⁶Ayo y cumano y catneco, y jaguimen y jâgâjo, sumaga guiya guajo, ya guajo guiya güiya.

⁵⁷Taegüine y Tata, ni lalâlâ, janamamaela yo, ya guajo lalâlâ pot si Tata; taegüineja locue y cumano yo, güiya locue ulâlâ pot guajo.

⁵⁸Estagüiya y pan ni tumunog guine y langet; ti parejo yan y tatanmiyo ni cumano y mana ya manmatae: y cumano este na pan ulâlâ para taejinecog.

⁵⁹Este sija jasangan guiya sunagoga, parejoja yan anae mamanagüe guiya Capernaum.

⁶⁰Enaomina megae gui disipuluña sija anae majungog este, ilegñija: Majetog na sinangan este; jaye siña umecungog?

⁶¹Si Jesus jatungo pot güiyaja namaesa, na y disipuluña sija mangogonggong pot este, ya ilegña nu sija: Ninafañatsaga jamyo nu este?

⁶²Jafa yaguin inlie y Lajin taotao cajulo anae gaegue antes?

⁶³Y espiritu mannanae linâlâ; y catne taya probechoña: y sinangan sija ni jusangane jamyo, ayo espiritu, yan ayo linâlâ.

⁶⁴Lao guajo palo guiya jamyo na ti manmanjonggue. Sa si Jesus desde y finenana jatungoja jaye sija y ti ufanmanjonggue, yan jaye y uinentrega güe.

⁶⁵Ya ilegña: Pot este na rason jusangane jamyo: na taya siña mato guiya guajo, yaguin ti ninae ni Tatajo.

⁶⁶Ayo nae, megae gui disipoluña sija manalo tate, ya ti mañija talo manjanao yan güiya.

⁶⁷Ayo nae ilegña si Jesus ni dose: Manmalago jamyo manjanao locue?

⁶⁸Ynepe as Simon Pedro: Señot, jayejam injanao güe? Jago nae guaja sija y sinangan ni taejinecog na linâlâ.

⁶⁹Ya jame injenggue, ya intingo na jago Ayo na Santos na guine as Yuus.

⁷⁰Si Jesus jaope sija: Ti juayig jamyo dose, ya y uno guiya jamyo anite?

⁷¹Ya jasangan pot si Judas Iscariote, lajin Simon: sa este y para uinentrega gae, uno gui dose.