San Juan 6:52-71

⁵²Ijkuakó n judíojteh opé motlatlajtolkopah iwa okimoliayah: —¿Kenomi weletis techmakas matikkuakah ikuerpo?

⁵³Jesús okinmili: —De milajka, de milajka nomechilia: Tla nomejwah amo nonkikuaskeh nokuerpo, Ne non onimochi ni tlakatl, iwa tla amo nonkoniskeh noesso, amo kipiah yolílistli.

⁵⁴Akin kikua nokuerpo iwa koni noesso kipias yolílistli non ayik tlamis, iwa Ne nikyolitis itech iksemi tonati.

⁵⁵Porke nokuerpo de milajka tlákuali, iwa noesso de milajka tlaonílistli.

⁵⁶Akin kikua nokuerpo iwa koni noesso, moseitilijtok nowa iwa Ne íwa.

⁵⁷Notajtsi Akin onechaltítlanki, yolitok, iwa Ne niyolitok por Ye, ijkó noiwa akin kimomajsewis nokueqrpo, yolitos por Ne.

⁵⁸Ne Ni paj non owaltemok de ilwikak, pero nin paj amo kemi n maná non okikuajkeh nomotatawah iwa satepa omijmikeh. Akin kikuas nin paj, nochipa yolitos.

⁵⁹Jesús ijkí okitemachti kan se sinagoga kan altepetl de Capernaúm.

⁶⁰Ijkuak ijkó okikakeh itlamachtijkawah n Jesús, miakeh okijtojkeh: —Nin tlamachtílistli kema chikawak, ¿akin weletis kajsikamatis?

⁶¹Jesús okimatia itlamachtijkawah omoichtakatlapowiayah ika tlan okijto, iwa okinmili: —¿Ye ni nomechkuejsoa?

⁶²¿Tlan nonkimoliah tla nonnechitaskiah Ne Non onimochi ni tlakatl nitlejkos ilwikak kan achto onikatka?

⁶³N espíritu kimaka yolílistli se kuerpo. N kuerpo mach itla ipati tla amo kipia espíritu. N tlájtolteh non Ne yonomechili wits de n espíritu iwa kimaka yolílistli.

⁶⁴Pero miálmasteh nomejwah akimeh amo nontlaneltokah. Jesús ijkó okijto porke desde achto yokimatia akimeh amo kineltokaskiah iwa akin kitemaktiskia.

⁶⁵Iwa okijto: —Yika, yonomechili amaka weletis wits nonawak, tla Notajtsi amo kitekawilia.

⁶⁶Ika noni, miakeh itlamachtijkawah n Jesús okikakajtejkeh iwa ayakmó onemiah íwa.

⁶⁷Ijkuakó Jesús okintlajtlani n májtlakteh iwa ome itlamachtijkawah: —¿Nomejwah noiwa nonkinekih non nechkakajtewaskeh?

⁶⁸Simón Pedro okinankili: —Noteko, ¿Akin ok se íwa tiaskeh? Sanwel Tejwatsi tikpia non tlájtoli non kitemaka yolílistli non ayik tlami.

⁶⁹Tejwah tikneltokah iwa tikmatih Tejwatsi n Yolchipawak de Dios.

⁷⁰Ijkuakó Jesús okinnankili: —Ne onomechpéjpenki nomejwah n májtlakteh iwan ome. Pero seme de nomejwah ye n diablo.

⁷¹Ijkuak ijkó okijto, Jesús otlajtoaya de Judas Iscariote ipiltsi n Simón, porke ye kitemaktiskia maya okatka seme de n májtlakteh iwa ome itlamachtijkawah.