Zone 6:52-71

⁵²Ke asa sa pinodalaena sa vinari bugori na vinari tokei tadirini. “Vegua meke kaqu va henani gita sa tie hie sa masana?” gua si arini.

⁵³Meke olaṉa la i Zisu si arini, “Maqu tozi va hinokarani gamu, be lopu hena ia gamu sa masana sa Tuna na Tie meke napoa sa eharana, si lopu kaqu boka tagoa gamu sa tinoa.

⁵⁴Ke asa sapu hena ia sa masaqu meke napoa sa eharaqu si tagoa sa sa tinoa hola, meke kaqu va turu pulea Rau si asa pa rane mumudi.

⁵⁵Ura sa masaqu si na ginani hinokara, meke sa eharaqu si na napo hinokara.

⁵⁶Asa sapu hena ia sa masaqu meke napoa sa eharaqu, si toa koa Rau si asa, meke Arau si toa koasa.

⁵⁷Gua sapu sa Tamaqu toana si garunau si Arau meke Arau si toaqu koasa Tamaqu, ke asa sapu hena ia sa masaqu si kote toa gua koa Rau.

⁵⁸Asa tugo sa bereti sapu gore mae guana pa Maṉauru. Sari tiatamamia si hena ia sa mana meke mate, ba asa sapu hena koasa bereti hie si kote toa hola ninae rane,” gua.

⁵⁹Zama ni Zisu saripu gua hire, sipu variva tumatumae pa sinaqoqi d pa Kepaniami si Asa.

⁶⁰Sokudi ri Nana tie pu luli koa Sa si avosia sapu gua asa, meke zama si arini, “Tasuna hola sa vina tumatumae asa. Esei kote boka va hinokaria sia?”

⁶¹Ba sipu va muloṉia e Zisu sapu qumiqumi nia ri Nana disaepeli sa Nana zinama, si zama la koa rini si Asa, “Vegua, sea atu koa gamu sa Qua zinama?

⁶²Vegua be dogoria gamu sage pulena sa Tuna na Tie pa Maṉauru, vasina pu koana tatasana? Kote boka koa ṉiṉira si gamu?

⁶³Sa Maqomaqona mo e Tamasa si ponini gamu sa tinoa. Ba sa masa si lopu boka ponini gamu sa tinoa. Sari na zinama pu zama atu ni Rau koa gamu si na Maqomaqo meke na tinoa.

⁶⁴Gua ba kaiqa gamu si lopu va hinokara,” gua si Asa. Na ele gilani Nana tu Zisu pa pinodalaena hokara, sarini pu lopu va hinokara, meke asa sapu kaqu qorana si Asa.

⁶⁵Meke zama pule la koa rini si Asa, “Gua asa, ke ele zamani gamu Rau, sapu loke tie si boka mae koa Rau, si be lopu turaṉa mae nia sa Tamaqu si asa.”

⁶⁶Podalae pa totoso asa si taliri taloa dia sari sokudi ri Nana disaepeli meke lopu luli pulea rini si Asa.

⁶⁷Ke nanasa la i Sa sari ka manege rua disaepeli, “Vegua, gamu ba kote taloa mia tugo?” gua si Asa.

⁶⁸Meke olaṉa la ia Saimone Pita si Asa, “Baṉara, koe sei si kaqu la gami? Sina Agoi mo tagoa sa zinama sapu ponini gami sa tinoa hola.

⁶⁹Gami va hinokaria meke tumae nia sapu Agoi mo sa Nabulu Hopemu te Tamasa.”

⁷⁰Meke olaṉa se Zisu, “Nake ele vizata gamu tu Rau si gamu ka manege rua, ba keke koa gamu si na tomate,” gua si Asa.

⁷¹E Ziudasi mo si gunia Sa, sa tuna e Saimone Isikarioti, sina asa mo si keke ri ka manege rua disaepeli, sapu kaqu qorana se Zisu.