San Juan 4:4-49

⁴Na zeꞌ nu yam rlagy ñi nu ded mi lo de yu ni Samaria.

⁵Orzeꞌ bruꞌñam tub gyedz nu la Sicar nu ri lo yu ni Samaria. Gyedz zeꞌ gare ga ri tub nac yu nu briic Jacob ni iꞌñ yu See.

⁶Lugaar zeꞌ zub zo nu rnii dey, “Zo ni Jacob.” Zeꞌ gusub Jesuuz nu rzu lagy mi gun gutsiñ mi nu tuñ bzam nez. Ndeꞌ tub or widoo.

⁷Orzeꞌ de yu nu rsyaꞌ lom bzeeñ dey mi. Orzeꞌ za dey lat gyedz nu za zii dey coz nu gow yu. Orzeꞌ bruꞌña tub biñ mñaa Samaria, bruꞌñam ruꞌ zo zeꞌ nu za gyiim nis. Orzeꞌ na Jesuuz rab mi biñ mñaa zeꞌ: ―Doo ñuu nis nir do̱ꞌ ―nam.

⁹Orzeꞌ na biñ mñaa zeꞌ rab mi Jesuuz: ―Ru nac ru tub mbecy Israeel. Zeꞌ ya̱ naca̱ tub biñ mñaa Samaria. Orzeꞌ ¿lagu rgyiiñ ru nis goꞌr lo̱? ―nam. Gun de mbecy Israeel wagac gyicy dey ni tub la coz nu mbecy Samaria, gun a̱ꞌ nap yuꞌ dey.

¹⁰Orzeꞌ na gaꞌ Jesuuz rab mi biñ mñaa zeꞌ: ―Bi bicy na nu ru gad lagy ru la na coz nu rbic Ñgyoozh, nunu bicy na nu gad lagy ru cyu nac ya̱, nu rdiña̱ nis do̱ꞌ lor, orzeꞌ ru cyiñ ru nis lo̱ ya̱ goꞌr. Orzeꞌ ya̱ rica̱ nis nu rbic gyel mbañ nu rishli nu goꞌr.

¹¹Orzeꞌ biñ mñaa Samaria zeꞌ nam rab mi Jesuuz: ―Zeꞌ ru, ni a̱ꞌ nur la nu par nu cor nis, gun zo ii gyi ri nis nañ ñi. Zeꞌ ru, ¿ca cor nis nu cuic gyel mbañ zeꞌ ne̱?

¹²Gyitoo bel ne̱ de̱ Jacob bzeeñ mi zo ii ne̱ de̱ ya̱. Nunu laab ii goꞌm nis gal nu de iꞌñ mi nu de bañcyug nim. ¿Walab gaal lily zir na ru gazeꞌ gyitoo bel ne̱ de̱ zeꞌ? ―na biñ mñaa zeꞌ.

¹³Orzeꞌ na Jesuuz: ―Dela de mbecy nu goꞌ nis ii, wayeca nu cuigy zir dey nis.

¹⁴Zeꞌ de mbecy nu goꞌ nis nu ya̱ grica̱, de mbecy zeꞌ rila wabigyaꞌ dey nis. Gun nis nu ya̱ grica̱, ndeꞌ gyicy ñi nu gyac nañ lardoo dey gal na tub zeꞌ nu driib nis. Nis zeꞌ gyicy ñi nu cui mbañ dey tub la ―nam.

¹⁵Orzeꞌ na biñ mñaa zeꞌ rab mi Jesuuz: ―Beni, orzeꞌ cuic ru nis zeꞌ do̱ꞌ gun cueꞌ gaꞌ nu cuigya̱ꞌ ñii nunu cueꞌ gaꞌ gyap gyi̱i̱ ñii ii ―na biñ mñaa zeꞌ.

¹⁶Orzeꞌ na gaꞌ Jesuuz: ―Yaa, ya te ñgyeer, nunu cyid nur yu ii ―na Jesuuz.

¹⁷Orzeꞌ na gaꞌ biñ mña̱a̱ zeꞌ: ―Sac ñgye̱e̱ ya̱ ―nam. Orzeꞌ na gaꞌ Jesuuz: ―Ru gaal rishli rniir nu sac ñgyeer,

¹⁸Gun bi bzu gaay ñgyeer. Zeꞌ yu nu zu gaꞌ na, yu zeꞌ walab ñgyeer. Ru rishli mniir lo̱ nu sac ñgyeer ―nam.

¹⁹Ornu biñ mñaa zeꞌ güeñ mi nu ndeꞌ, orzeꞌ nam rab mi Jesuuz: ―Na bet laga̱ cuen nu ru nac ru tub biñ nu rnii por cuen ni Ñgyoozh.

²⁰De gyitoo bel ne̱ de̱, de biñ Samaria, briib zily dem Ñgyoozh too bicy ii. Zeꞌ de ru rnii der nu gal Jerusaleeng rlagy ñi nu riib zily mbecy Ñgyoozh, rnii der ―na biñ mñaa zeꞌ.

²¹Orzeꞌ na Jesuuz rab mi biñ mñaa zeꞌ: ―Biñ mñaa, guña ñuu lagy riidz nu rne̱e̱. Shuub tub dzi nu de mbecy griib zily dey Ñgyoozh, uz den. Orzeꞌ walagyaꞌñ nu cyid dey too bicy ii, ni nu gya dey Jerusaleeng.

²²De ru mbecy Samaria wagad lagy der la na biñ nu driib zily ru. Tees de̱ ya̱ mbecy Israeel rad lagy de̱ la na biñ nu driib zily de̱, gun lat de mbecy Israeel gruu mod par nu gruu mbañ mbecy.

²³Tees shuub dzi, nunu na la ndeꞌ ornu de mbecy nu rishli gaal griib zily Ñgyoozh uz na gyicy dey ñi tub mod nu rishli, mod nu rlagy Espiriit Yon ni Ñgyoozh, gun ndeꞌ mod nu rlagy Ñgyoozh uz na. Ndeꞌ mod nu rlagy mi nu gyicy de yu nu griib zily mi.

²⁴Gun Ñgyoozh nac mi Espiriit, nunu de yu nu griib zily mi rlagy ñi nu gyicy dey ñi tub mod nu rishli, tub mod nu rlagy Espiriit Yon nim ―nam.

²⁵Orzeꞌ na biñ mñaa zeꞌ rab mi Jesuuz: ―Rad lagya̱ nu cyid Mesías, biñ nu pcui Ñgyoozh nu co mbañ mi den. Laab mi zeꞌ lam Crisht. Ornu mi zeꞌ cyid mi, orzeꞌ shaal mi dela coz lo̱ de̱ ―nam.

²⁶Orzeꞌ na gaꞌ Jesuuz: ―Mi zeꞌ nac ya̱, biñ nu rnii nu ru na la ―nam.

²⁷Laab or la zeꞌ bri de yu nu rsyaꞌ lom. Orzeꞌ za nu la ic dey nu Jesuuz rom riidz nu tub biñ mñaa. Tees ni tub la dey wancuic yu baloor nu ngugyiꞌy lo biñ mñaa zeꞌ la coz rlagy mi, o nu ngugyiꞌ dey lo Jesuuz ben lagu ro num biñ mñaa zeꞌ riidz.

²⁸Orzeꞌ biñ mñaa zeꞌ bzeeñ ga lam reꞌ nim. Yam lat gyedz. Orzeꞌ nam rab mi de mbecy:

²⁹―Da der gun cha güiir tub biñ gyeey nu mniim dela coz nu bicya̱. ¿Ben a chii la a walab mi zeꞌ Mesías? ―na biñ mñaa zeꞌ.

³⁰Orzeꞌ bruu de mbecy lat gyedz zeꞌ za dey lo Jesuuz.

³¹Lat nu ya biñ mñaa zeꞌ, orzeꞌ de yu nu rsyaꞌ lo Jesuuz rnishbaa dey lom nu gow mi gyit. Orzeꞌ na dey: ―Masht, bdow mas ñuu miꞌ ―na dey.

³²Orzeꞌ nam rab mi dey: ―Ya̱ ricy cupa̱ coz nu da̱w. Tees de ru wagad lagy der la coz ndeꞌ ―nam.

³³Orzeꞌ de yu nu rsyaꞌ lom brugyiꞌ rgugyiꞌ dey lo losaꞌy. Orzeꞌ na dey: ―¿Walab gaal bi biid nu ca na mbecy coz nu gow mi? ―na dey.

³⁴Orzeꞌ na gaꞌ Jesuuz rab mi dey: ―Ornu gyicya̱ coz nu rlagy Ñgyoozh, biñ nu bzuu nez ya̱, nunu ornu gzaꞌ lo̱ riiñ nim, orzeꞌ ndeꞌ nañ gal na de coz nu da̱w.

³⁵De ru mbish tub riidz nu rnii der: “Gabee ricy falt ruꞌ tap beey par nu teꞌn cosech”, rnii der. Zeꞌ ya̱ rne̱e̱ lo der nu güiir lo de mbecy nu yad ii. Na dey gal nu na tub nac gyel. Güii la nañ. Bi guc niñ nu dudeꞌ cosech, gun bi zu lily dey nañ lardooy nu gyicy cup dey consuel lo̱ ―na Jesuuz―.

³⁶’Gun de yu nu cha teꞌ cosech zeꞌ, bi gyad iy, nunu cosech nu rteꞌ dey zeꞌ, ndeꞌ de mbecy par nu cui mbañ dey tub la, gun orzeꞌ de yu nu rnuuz, gal nu de yu nu rteꞌ tublaazh la gyet lagy dey.

³⁷Nii tub riidz nu rishli nu rnii mbecy: “Tub yu rnuuz yu. Zeꞌ tuubaꞌy rteꞌy.”

³⁸Ya̱ bzuu neza̱ der nu gua teꞌr lat tub nac gyel zeꞌ nu wangyicy la der riiñ. Zeꞌ reñaꞌ dey bicy yu riiñ lat gyel zeꞌ. Zeꞌ de ru byash der cosech nu nac riiñ nu bicy reñaꞌ dey ―nam rab mi de yu nu rsyaꞌ lom.

³⁹Na, tonaꞌ la zigy de mbecy Samaria nu yuꞌ gyedz zeꞌ bicy cup dey consuel lo Jesuuz nu nac nu mnii biñ mñaa zeꞌ lo dey. Orzeꞌ nam: “Mi zeꞌ mniim lo̱ dela coz nu bicya̱”, nam.

⁴⁰Na ornu bruꞌña de mbecy Samaria lom, orzeꞌ mnishbaa dey lom nu gyiyeeñ mi num dey. Orzeꞌ byeeñ num dey cyup dzi.

⁴¹Orzeꞌ zigy zir mbecy bicy cup dey consuel lo Jesuuz nu nac de riidz nu mniim.

⁴²Orzeꞌ na dey rab yu biñ mñaa zeꞌ: ―Na ricy cup de̱ consuel lo Jesuuz walab nu nac riidz nu mnii ziꞌl ru, sinu nu nac nu güeñ gyidag la de̱. Nunu rishli gud lagy de̱ nu mi ii nac mi biñ nu co mbañ de mbecy nu yuꞌ gyishlombecy ―na dey rab yu biñ mñaa zeꞌ.

⁴³Na ornu bded ni cyup dzi zeꞌ, orzeꞌ bruu Jesuuz Samaria nu yam par lo de yu ni Galilea.

⁴⁴Gun laab ub mi mniim nu tub yu nu rnii por cuen ni Ñgyoozh waca lagy de mbecy ledz yu loy, nam.

⁴⁵Na ornu brim lo de yu ni Galilea, orzeꞌ de mbecy nu yuꞌ de lugaar zeꞌ nap bicy nu dey mi, gun bi bya dey saꞌ ni Pas Jerusaleeng. Ndeꞌ bi bzaac dey de coz nu bicy mi lat saꞌ zeꞌ.

⁴⁶Orzeꞌ Jesuuz bish cyam zam Caná, tub gyedz nu ri lo yu ni Galilea. Laab lugaar zeꞌ nu bicy mi nu byac nis ñup ni urbyay. Na zu tub mbecy nu zu riiñ ni gubier. Zeꞌ iꞌñ yu mbish rat yu Capernaum.

⁴⁷Yu zeꞌ, ornu güeñ yu nu bruum Judea nu brim Galilea, orzeꞌ guay mnishbaay lom nu cham yuꞌy nu gyicy yac mi iꞌñ yu, gun bi zuu lay nu gat yu.

⁴⁸Orzeꞌ Jesuuz nam rab mi yu nu zu riiñ zeꞌ: ―De ru wagyicy cup der consuel lo̱ benu wazac der muesht o nusuriidz ―nam.

⁴⁹Orzeꞌ na yu nu zu riiñ zeꞌ rab yu Jesuuz: ―Jesuuz, yaa chan gun nis gat iꞌña̱ ―nay.