Jon 4:4-49

⁴Ma sal i mi lo, i la na fatpoton falifuh na Samaria.

⁵Ke ka tapiek na nenge maleh na Samaria ri foteng u ini Sikar, fatat isi sun nanal ae Jekop i ta ta u sing ke kalalik Iosep.

⁶Ke aiwa e toh na dan ae Jekop i kef ta u, ma Iesu ka mut e fo na dolon ninla, pesu ka kiis na baban toh na dan ae. Ma aunbiing ae, i fasih aragii sangful ini u e aunbiing na siat.

⁷Aunbiing nenge fifin tina Samaria i la isi utfe dan, ke Iesu ka diik u aragii, “Ifasih on faumin iau ini ti dan?”

⁸Foron berberat na fafausum kia ri ka la tah una maleh ae, isi fiil inen.

⁹Fifin tina Samaria ka kiliis u aragii, “O sikin Iudaia ma ia fafnan Samaria. Arafah o ka diik iau isi ti dan isi ok in?” Ka use u arae, wara le fan Iudaia ke fan Samaria biil ri fatala turim la.

¹⁰Iesu ka kiliis u aragii, “Male o ka usum tah na fafen ke God, ma seh ae i sising o isi ik yin, ke ifasih ok sising ta u, ma ik ta ta u e dan na liu usuf o.”

¹¹Fifin ae ka tara aragii, “Ier, biil ti utut kiam, ma toh na dan i puh kanaka. On kep dan na liu ae fiawah?

¹²Arafah, o wol le o laumet lo tubutamat kerer Jekop? I ta ta u e toh na dan igii sing kemem, ma i tom ka yin ta lo turan berberat kia ke foron bulmakau ke foron sipsip kia.”

¹³Iesu ka kiliis u aragii, “Fanu tikii ae ri yin tina dan ae, rin metdan sabin,

¹⁴isau le seh sau ae i yin tina dan igii ia ta u sing i, biil mang in to metdan. Biil. Dan igii ia ta u sing i in tapiek arae matan dan i ring ma in ta liu fitliu.”

¹⁵Fifin ae ka tara aragii, “Ier, ta dan ae sing iau, isi biil sabin ian metdan ma biil mang ian fis sabin uga isi utfe dan.”

¹⁶Ka fas u aragii, “La, kam pes antum ma kamuk fis uga.”

¹⁷Fifin ae kiliis u aragii, “Biil ti antung.” Ka fas u aragii, “O orek tekentu aunbiing o tara le biil ti antum.

¹⁸Tekentu lo le, o ka telpes ta ilim e kaltu. Ma kaltu igii o kiis tura, biil e antum. Sanih o ka use ta u i tekentu.”

¹⁹Fifin ae ka tara sing i aragii, “Ier, ia par u aragii le, o nenge poropet.

²⁰Foron tubutamat kemem ri lotu la na pungpung igii, isau le gam fan Iudaia gam tara le falifuh ae keren lotu la lo, e Ierusalem.”

²¹Iesu ka fas u aragii, “Tin ier, unune lo iau, nenge aunbiing in tapiek ae biil gamen lotu una aisa Tata aga na pungpung igii le na Ierusalem.

²²Gam fan Samaria, gam lotu una aisan sanih biil gam usum lo, kemem lotu una aisan sanih kemem usum lo, wara le fafaliu ke God i la sing kemem fan Iudaia.

²³Isau le nenge aunbiing in tapiek ma igii mang ka tapiek, aunbiing foron tom lotu tekentu rin lotu una aisa Tata ini tanwa ma ini tekentu, wara le Tata i im isi foron matngan tom lotu arae.

²⁴God i tanwa ma foron tom lotu kia, rin lotu tom ini tanwa ma ini tekentu.”

²⁵Fifin ae ka tara aragii, “Ia usum le Mesaia, ae ri foteng u ini Karisito, in tapiek. Aunbiing in tapiek, in famalal kerer ini foron tier tikii.”

²⁶Ke Iesu ka fas u le, “Iau sau igii, ia orek turam.”

²⁷Fanpil, ke berberat na fafausum kia ri ka tapiek, ke ri ka bitit na aunbiing ri tafe u i ororek la turan nenge fifin. Isau le biil tikas i diik u le, “Sanih o ier isi?” le aragii “O orek tura isi sanih?”

²⁸Ke fifin ae ka luun ufu luunluun dan kia ma ka fis una maleh, ka fas fanu le,

²⁹“Gam la ugapiek ma gamek par nenge kaltu, i fas iau ini foron tier tikii ia tel ta u. I sangan e Mesaia?”

³⁰Ri ka suuh tina maleh ma ri ka la isi tafe u.

³¹Aunbiing sau fifin ae i kang koseng ri, berberat na fafausum kia ri ka fas u le, “Rabi, ien mang.”

³²Isau le Iesu ka fas ri aragii, “I mel e inen aiak una ien ae biil gam usum lo.”

³³Ke berberat na fafausum kia ri ka fadiik fis tom ini ri le, “Awii ngan tikas ka fen ta u ini ti inen?”

³⁴Iesu ka tara sing ri aragii, “Inen aiak, isi le ian misuut na wolwol ke seh i wuun ta iau uga ma isi farop foim kia.

³⁵Gam tom, gam use u la le, ‘Infet biitom e funiil aiwa isi aunbiing na ilfafua.’ Ia fas gam le, gamen sapeng na matmi ma gamek par una mok. Ka matuk mang e mok una ilfafua.

³⁶Tom lalamok, ik kep fifiil kia mang, ma ik lalamok turim una liu fitliu, isi tom lalamok ke tom soso ruk laes turim.

³⁷Pesu, orek ae i tekentu, ‘Nenge kaltu i soso ke neng ka lalamok.’

³⁸Ia wuun ta gam isi lalamok na mok ae biil gam foim ta lo. Fal tom ri tel rakrakai na foim ta lo ma gam ka kep rokap tina songsong kiri.”

³⁹Ifuun e fan Samaria tina maleh ae ri ka unune lo Iesu, i wara na orek an famalal ken fifin ae i tara ta le, “I fas ta iau ini foron tier tikii ia tel ta u.”

⁴⁰Ke, na aunbiing fan Samaria ri ka la una aisa, ri ka tel papte u ke ka kiis tura ri na iu e biing.

⁴¹Ma fanu fuun biitom ri ka tapiek tom unune i wara na orek ke Iesu.

⁴²Ri ka fas fifin ae le, “Biil kemem unune sau wara na orek kiam, kemem unune wara le kemem ka ongen ta u ke kemem ka usum le kaltu sau igii, i e Tom Fafaliu ken fanu tikii na piklinbat.”

⁴³Namih na iu e biing aiwa, Iesu ka la una Galili.

⁴⁴Iesu tom ka use famalal u le, nenge poropet, biil ri bulat la lo na maleh kia tom.

⁴⁵Isau le, aunbiing Iesu ka tapiek na Galili, fan Galili ri ka somangat pes u. Ri ka par ta foron matngan fakileng tikii i fatapiek ta u na Ierusalem, wara le ri sabin ri la tah na Inen na Liuliu Kulef.

⁴⁶Ka tapiek fis sabin na Kana, na falifuh na Galili, na maleh ae i soikis ta dan una wain. Ma i mel e nenge tom foim ken king, kalalik kia i sasem na maleh na Kapernaum.

⁴⁷Aunbiing kaltu ae ka ongen u le Iesu ka la tah tina Iudaia una Galili, ka la una aisa ma ka sising pes u le in la una Kapernaum ma ik faliu pes ke kalalik fatat in met.

⁴⁸Iesu ka fas u aragii, “Male biil gam par foron rakrakai na fakileng ke foron tier an fabitit, biil gamen unune.”

⁴⁹Kaltu ae ka fas u aragii, “Ier, kara mang, tarama keng kalalik in met.”