San Juan 21:4-20

⁴Tsiñee lëë lyu mer kyaani, lëë Jesús ptsiñ chu nistoo go, per byeñdy xpëëdscuel xaa nii lëë xaaw.

⁵Lëë Jesús chëb: —¿Pe ni tu mël karty kñaasy to? Lëë xpëëdscuel xaa chëb: —Ni tu ma.

⁶Tsigo lëë Jesús chëb: —Kol kchon xkyex to kwi barkw nëzli tsiin kñaasy to mël. Lëë xaa psoob tiits, aan loxsye ngo xlyëbty xaa kwii xaa kyex lo nis, porñee singootyee ndaly mël kwnaasy xaa.

⁷Tsigo lëë mëëdscuel nii mastre xkëstyoo Jesús chëb lo Pedre: —¡Lëë Jesús ngue! Siikñee biñ Simoñ Pedre nii Jesúso, lëë xaa kokw xab xaa, porñee nakwty xaa xab xaa, aan lëë xaa kwsëëb lo nis.

⁸Lëë stubla xpëëdscuel Jesús ptsiñni barkw chu nis, porñee kiin tu kyoow metre nak laañee so barkw par chu nis. Ngopxax xaa kyex nii kaktsë mël.

⁹Tsiñee lëë xaa byety leñ barkw, kon xaa nii lëë ki tse noyek, ni lëë tu mël tse xoob lo ki, ni lëë xaa kon nii lëë kyaxtily ntsiib.

¹⁰Lëë Jesús chëb: —Kol tëni bla mël nii kal lox kwnaasy to.

¹¹Lëë Simoñ Pedre kwyëp leñ barkw aan lëë xaa kwtopxax kyex nii kaktsë kchë mël ngol axte chu nis. Aan nikxe nii no tu kyoow choowptsiiptson mël leñ kyex ko, per pchostyo.

¹²Lëë Jesús chëb: —Kol të kxiincheñ do. Aan ni tu xpëëdscuel xaa byaxty nyabtiits cho nak xaa, porñee kchë xaa nan nii Jesúso.

¹³Lëë Jesús kwseñ kyaxtily aan lëëw kwtiisy xaa. Singo gak kwtiisy xaa mël.

¹⁴Lëëw byon vuelt nii xyaklo Jesús lo xpëëdscuel loxsye pañ xaa.

¹⁵Tsiñee lëë wxiincheñ kwlox, lëë Jesús chëb lo xiñ Juan nii lë Simoñ Pedre: —Simoñ, ¿pe xkëstyool naa sinak nii xkëstyoo xaa re naa? Lëë Pedre chëb: —Nanoo nii xkëstyoon lii. Lëë Jesús chëb: —Deelñee xkëstyool naa busy, kon meñ nii xniladzy xtitsaa sinak nii xtyoon mëkwxiily.

¹⁶Lëë Jesús kwnabtiits lo xiñ Juan nii lë Simoñ Pedre stub, chëb xaa: —Simoñ, ¿pe xkëstyool naa? Lëë Pedre chëb: —Nanoo nii xkëstyoon lii. Lëë Jesús chëb: —Deelñee xkëstyool naa busy, kon meñ nii xniladzy xtitsaa sinak nii xtyoon mëkwxiily.

¹⁷Lëëw byon vuelt nii lëë Jesús xñabtiits lo xiñ Juan nii lë Simoñ Pedre xñee xaa: —Simoñ, ¿pe xkëstyool naa? Tsigo lëë Pedre pteenë, porñee lëëw byon vuelt nii xñabtiits xaa dyon pe xkëstyoo Pedre xaa, aan lëë Pedre chëb: —Nody tu cos nii nandyoo. Nanoo nii xkëstyoon lii. Lëë Jesús chëb: —Deelñee xkëstyool naa busy, kon meñ nii xniladzy xtitsaa sinak nii xtyoon mëkwxiily.

¹⁸Nli xñen nii worñee kokoo xaa yeeñ, yuuboo pxituu leñoo par tsil laañee kokladzyoo. Per tsiñee lëël kox, lëël klis ñal parñee kxituu meñoo, ni lëë meñ tsini lii laañee chaklastyoo tsil.

¹⁹Tsiñee lëë Jesús chëb ngo, lëë xaa kwnee xa no nii kety Pedre parñee kuuñ ksak xaa Dios. Loxsye ngo lëë xaa chëb lo Pedre: —¡Tënal naa!

²⁰Tsiñee lëë Pedre psuugw lo, kon xaa nii lëë mëëdscuel nii mastre xkëstyoo Jesús nal xitsy xaa. Lëë xaa go sob kwi Jesús wtse nii kok xtsee, ni lëë xaa go kwnabtiits chëb: “Jesús, ¿cho kakniladzy lii?”