Johanningundru 21:4-20

⁴Matja tanluibanarina, Jesus dirkalani terkana wonti; ja mili wata milkila nganana wonti Nau Jesus nganai.

⁵Jesus tanangu jatana wonti: “Kupa worajai, jura wata tajila ngarnalkai?” Tanali nunkangu kalabana wonti: “Pani.”

⁶Nau tanangu jatana wonti: “Bota panki ngunarani jama woranau, ja jura mankamankala nganai!” Tanali worana wonti, ja tana ngandandarina wonti nina parumala paru marapundru:

⁷Naupini mili, nina Jesujeli ngantjana wonti, Petrungu jatana wonti: “Nauja Kapara nganai!” Simon Petrulu ngarana wonti Nau Kapara ngananani, nau katieli ngampina wonti, ngangau nau balu nganana wonti, ja ngapani kulkungana wonti.

⁸Mili nguru botali wokarana wonti, ngangau tana wata worita nganana wonti dirkalandru, a-ai, windri tintipitiwidri 200, ja tanali jama parunto parumana wonti.

⁹Tana matja dirkalaia dunkana tarana, tanali najina wonti turubilla turn paranani, ja paru nunkangupini paranani, ja buka.

¹⁰Jesus tanangu jatana wonti: “Padakanau tanangupini parundru, tananaia jura karari patana warai!”

¹¹Simon Petrus wapana wonti, ja jama dirkalaia parumana tarana wonti, paru pirna manamiri 153. Jeruntjajeli jama wata purana wonti.

¹²Jesus tanangu jatana wonti: “Kaparanau, manabuka tajanau.” Wata mili kulno wontjana wonti nina jakalkala: “Worana jidni?” Ngangau tana milkila nganana wonti, Nau Kapara nganana wonti.

¹³Jesus wokarana wonti, ja buka patana wonti, ja tanangu jinkina wonti, ja bakana parundru.

¹⁴Naupini pota parkulu nganai, Jesus milini wondraterina wonti, Nau narindru matja tepi terkakana warai.

¹⁵Tanali manabuka matja tajina, Jesus Simon Petrungu jatana wonti: “Simoniai, Jonani ngatamurajai! Jundru ngana morla ngantjai tanangupini?”: Nau nunkangu jatana wonti: “Kau Kaparajai, jidni milkila, ngato jidnana ngantjai.” Nau nunkangu jatana wonti: “Ngakani tjipi kuparu ngamalkau!”

¹⁶Nau nakaldra pota mandrula nunkangu jatana wonti: “Simon Jonaniai! Jundru ngana ngantjai?” Nau nunkangu jatana wonti: “Kau Kaparajai, jidni milkila, ngato jidnana ngantjai.” Nau nunkangu jatana wonti: “Ngakani tjipi ngamalkau!”

¹⁷Nau pota parkulula nunkangu jatana wonti: “Simon Jonaniai! Jundru ngana ngantjai?” Petrus ngaurongauro nganana wonti, ngangau Nau pota parkulu nunkangu jatana wonti: “Jundru ngana ngantjai?” Ja nau nunkangu jatana, wonti: “Kaparajai, warupoto jundru milkila, jundru ngujamaj, ngato jidnana ngantjai.” Jesus nunkangu jatana wonti: “Ngakani tjipi ngamalkau!

¹⁸Morlalu, morlalu, ngani jinkangu jatai: Jidni teri ngananala, jidni munta ngampinala, ja wirarinala woderi jundru ngantjanala; jidni matja pinaru pantjina, jidni mara jinkani ngutaterila nganai, ja kulno ngurujeli jidna ngampipala nganai, ja wapalkala nganai woderu jundru wata ngantjai.”

¹⁹Ninapini Nau jatana wonti wondrala, mina narieli nulu Goda pirna ngankananto. Ja Nau jenia matja jatana, Nau nunkangu jatana wonti: “Ngakangu karipateriau!”

²⁰Petrus karitjinawontikana wonti, ja nulu nina mili karipaterinani najina wonti, nina Jesujeli ngantjana wonti, nau bakana bukani nunkangu munambirini jeniterina wonti ja jatana wonti: “Kaparajai, worananau nganai nulu jidna wondawondala nganai?”