Jon 21:4-20

⁴Una komkobot raut, o Iesu i tur taru nago una usalin, ikut a kum nat na ususer ka det tasmani lena o Iesu ut ra.

⁵Ra o Iesu i kakabo torom det lena, “A kum nat, mot dat pas lako kiripo ut?” Det ipul kut lena, “Awu.”

⁶O Iesu i watungi tandet lena, “Mot in woro a uben una papor sot na lamamot, sur mot in dat lako kiripo.” Det woro i lari ra i watungi. Ra det lagano datdat tar a uben, uni i bukus nama kum kiripo.

⁷A nat na ususer ra o Iesu i ser nem doko i, i watungi tan o Pita lena, “A Labino ut nago!” O Saimon Pita i longoro i lena a Labino ut nago, ra i pipis melet pas in namalu ra i palos tari ra i woro a uben, ma i sirok losop utiro utasi.

⁸A kum nat na ususer det mur nama pot unago una usalin. Ma det dat piso pas a uben ra i bukus nama kum kiripo, uni ka det bakbak gusun a usalin, i elar kut nama limo na noino sinanga.

⁹Det sirok gusun a pot, ra det tama a lakit na sungun ma a kiripo kusapat netes uni, ma det tama i kai a beret.

¹⁰O Iesu i watungi tandet lena, “Mot in los lako kiripo urin tagun a kum kiripo ra unikutri mot uben pasi.”

¹¹Ra o Pita i kas una pot, ra i dat pirso a uben unago una usalin, ma i ulit ru a kum kiripo gusuni. I bukus nama kum lamlabino kiripo, a nilulukin det i elar nam ara mar ma limo na noino ma tul. Det susut doko, ikut a uben ke tararos.

¹²O Iesu i watungi tandet lena, “Mot wan urin ma mot in nangon.” Kataio tagun anun a kum nat na ususer i pet lar pasi sur in tingi lena, “Ui osi?” Det sa tasmani lena i a Labino ut ra.

¹³O Iesu i los pas a beret ma i tabor det nami, ra numur i tabor det bulung nama kiripo.

¹⁴Iri a mantul na dino ra o Iesu i wanpat torom anun a kum nat na ususer, numur tan anun a katkatutur melet gusun a minat.

¹⁵Ra det sa wangon rop, o Iesu i watungi tan o Saimon Pita lena, “Saimon, nutun o Jon, pepetlai, u nem doko iau taun det ri?” I balu i lena, “Lingmulus, Labino, u tasmani lena a nem ui.” O Iesu i watungi tano lena, “Un tabor anung a kum nat na sipsip.”

¹⁶O Iesu i manru u iting toromi lena, “Saimon, nutun o Jon, pepetlai, u nem doko iau?” I balu i lena, “Lingmulus, Labino, u tasmani lena a nem ui.” Ra o Iesu i watungi tano lena, “Un tamtamabat anung a kum sipsip.”

¹⁷Ra o Iesu i mantul u watungi tano lena, “Saimon, nutun o Jon, pepetlai, u nem iau?” O Pita i tupunuk, uni o Iesu i tingi a tulu dino lena, “U nem iau?” I watungi tano lena, “Labino, u tasman a kum utna rop. U tasmani lena a nem ui.” Ma o Iesu i watungi tano lena, “Un tabor anung a kum sipsip.

¹⁸“A inanos ui nama lingmulus, ra u barman, ui ut u ser mar pas ui, ma u ser wan una kum nubual ra u nem na wan iai. Ikut ra un takano, un kodos aru lamam, ma ara gisen ut in mar ui, ma in ben tar ui una nubual ra ko nem na wan iai.”

¹⁹O Iesu i watungi lenri, sur in ese a ngas na iniru ra in los o Pita. Un anun a iniru ra, in ulabo pas o God. Ra i sa watung tari lenri, i inanosi lena, “Un mur iau.”

²⁰O Pita i ger ma i tama a nat na ususer ra o Iesu i ser nem doko i, kura i mur der. A nat na ususer ra, i ra i ere torom o Iesu una nundet a ururop na inangon, ra i ting o Iesu lena, “Labino, osi ra in usobor tar ui?”