Ion 21:4-20

⁴Tane tadinaida omo wisedio Iesu esa sa tampe enedio wawe alala me ewane ewakoasaiena.

⁵Ita mo ewakoasaio Iesu mukalene waitaramone wanase, “Sosona, e moia da wadalana, ba dia?” Mo leusane waienase, “Dia, no borounten.”

⁶Mape Iesu mo diamone wanase, “E waa waiwa on deneuwe lawaila aubene moia uara lawaimona.” Mo epe etane ruawantone dewasaieno lawaibu bedewe moia uduuduleno mai teinepaposidepona rua, dia.

⁷Tane wawe alala dea mida Iesu nuawadawadaidasadia moia uaraia ewamone Pita diene wanase, “Apana sa Tatambaida enede, mai mida.” Sowa sa me epe dieno etene tauwadea garawa onape tautaulala nolawa baiwa itune ena wadene taune waa osowe wandia rowolene esa bedewainta waiwe alen.

⁸Ita me sosowa isiwa waa bedewe waimoia lawaibu moia nopesana teineie do Pita alena wawe waa asiasi waiwe antoie. Tane waa sa alepie waiwe wisepia awa kampaida, apana waiwe enepie aiawa wapio etaetala.

⁹Mo esa waiwe wimone ia idia bupa osowe bouri imodio ita ia tampe bured wineio ewamoiena.

¹⁰Tauma Iesu mo diamone wanase, “E bouri isiwa lawaimolana otene do winlena.”

¹¹Saimon Pita ema etene waa bedewe kawalene alene lawai moia nopelena doa waiwe teinenauben. Tane lawai sa bedewe bouri debamauia wisiawa 153 wineia me teinenauben, tane lawai mai pumpu wapona, dia.

¹²Pita nolawa diasano aupe Iesu wawe alala diamone wanase, “Sosona, winleno nana nata.” Wawe alala Iesu do nana sa napua baiwantoio bedeuwo mai mida da me waitarawa insepona me mida, ipawa mo bauta Tatamba atensaiena, tane waitarawa santone di eiena.

¹³Ita Iesu alene bured wadene mo wanamone aupe bouri iilala wanamono naiena.

¹⁴Iesu bo bedewe enenwisene walama nata wawe alala du bedewe auweio mampo wisene sabamoleno eweiena. Ita tauma natadeawa esa tampe mo mampo sabamoleno eweiena.

¹⁵Mo nana naieno dialeno aupe Iesu Saimon Pita waitarasane wanase, “Saimon, Ion otopa, e ide ne nuawadawadaidaneiana, mai sosoa ema isiwa ruau, ba?” Ita Pita me sipoasane wanase, “Oa Tatamba, e atena ne e nuawadawadaedine wainedina.” Iesu epe etene me diene wanase, “Ne sipsipna sanaa nana wanamono nampa.”

¹⁶Iesu Pita epe diene osowe waitarasane wanase, “Saimon, Ion otopa, e ne nuawadawadaidaneiana, ba?” Ita Pita osowe me diene wanase, “Oa Tatamba, e atena ne e nuawadawadaedine wainedina.” Mape Iesu Pita diene wanase, “Ne sipsipna oniadewasamone nana wanamono waimompa.”

¹⁷Ema aupe Iesu Pita osowe waitarasane wanase, “Saimon, Ion otopa, e ne dianeawo etapa, nuawadawadaneiana, ba dia?” Iesu Pita osoweosowe epe waitarasadio me nuawa pareidaleno wanase, “Tatamba, e dewa uduudu atena, mai da koasapona, dia. E atena ne e nuawadawadaidaedine wainedina.” Mape Iesu leusane me diene wanase, “Ne sipsipna nana wanamono nampa.

¹⁸Ne ulaipa dieedina, e sanaa wainie benaitie eba insaisaawo aitie. Tane e tontaite gulauite wane witaa aubewo apana da e witaa wadepie banlaepio naepe e a dabuaitanawo aitana.”

¹⁹Iesu gagalo sa wane mampe Pita bo inainamba ambi ando bolepie mampe God ebowa debamasapie ionosapia umanawa wan. Ita mape Iesu Pita diene wanase, “E ne waroroneana!”

²⁰Iesu Pita nata epe gagalontoio Pita leulene wawe alala mida Iesu nuawadawadasadia me adiwe enedio ewen. Pita sowa sa Iesu wawe alala do rawi dea bedewe nana naie waimoio bedewe me Iesu tampelene waine Iesu waitarasana apanawa. Me waitaralene wanase, “Tatamba, mida e wadaepie nanaepi?”