Sam keil 66:8-20

⁸Meatin keil ten out netan, rehemasmas Ahi orer, masmasien orer heha vasin out.

⁹Kei kur koe moulien orer, romaentei tounah vasut ir.

¹⁰Ahi, keik kosan sakvisien min komai. Suval silva koa ahang kan moteini, komotein moulien onomai en sakvisien keil.

¹¹Komaen komai mimot en eitapolis tai, ka koling tounah keil koa meas en eisilomai.

¹²Komaen koakeil avi vativieh ral komai avitan en komai, e memu koteh ahang ka oai. Ka kosa, komul kolah lat komai meva en out ten amas.

¹³Nikur sanien votut hemai en Eim Votut onom ka niniti hehat minuk, nisani minuk asa koa navat kati.

¹⁴Asa koa navat kati minuk navong namul en avong tisa, nisani minuk.

¹⁵Nikur sipsip keil ka ninit keil en ahor ten sanien venuk, ninit buluk ka nani keil emun hesakin vite hetupan hehat venuk.

¹⁶Kami koa mivouhou min Ahi, almai ka allong nau. Nihitehiteni min kami tounah sa koa kei mumoni minau.

¹⁷Navis kataunien mini, ka namasmasi ral min souen keil.

¹⁸Munak nihuli kat tisaen keil en moulien onak, Ahi Asuv hesakras valong nau.

¹⁹Ka Ahi raengonau varei, kei long hisien onak.

²⁰Namasmas Ahi veni kei roseseintei hisien onak, vuo rokulattei envatien onen koa mul lises ka lisenges ranau.