Sam keil 65:2-13

²veni keik komul kosan aneite ten hisien keil onomai. Meatin keil ten out vasi imai venuk,

³veni sakkalkalien keil onomai amuas komai, ka keik kosahul lin tisaen keil onomai ka konaleletei mun natisa en komai.

⁴Sien hel en koakeil keik kolei kan keil keke umai avato en teahu ten Eim Votut onom. Komai mehelonge hetahos imok en mormore tounah keil onom ten demkatien koa amul en Eim Votut onom.

⁵Kosan aneite ten hisien keil onomai navong melohlin meatin sav keil en avong ten rea. En keihoen komutut komai. Meatin keil koa amul rahit out netan ka en usi atas, keil aling desien one enuk.

⁶Ral min keihoen onom, koling kat vatihou keil, keil arie lat mari keihoen onom.

⁷Kosakin atas keil amerau, verien ten tahe keil, komumoni va netan. Kosakin koakeil amumon selien, aro raeng.

⁸Meatin keil ten out vasi en out netan amutimanin ven marmari tounah keil koa komumoni. En keite vasi keil ten out netan, meatin keil amakul en sien venuk.

⁹Kolei kat revi atan ka kosan ous musani, kosakin amas mul ien ka tounah vasi amoul tahos ien. Kosakin oai vilelau en poal keil, ka kosakin anien mul moul en out netan. Keik komul komumoni mukok:

¹⁰navong meatin keil akah lin out evus, kosan ous musani. Atan koa keih, ous sakini mai memerau, ka tounah vasi akilea avahitehiteh eni.

¹¹Ven tahosien onom, kosan amas min komai. Out vasi kova ien, amas musiluk.

¹²Kosakin tirendan osomai avilelau en atan onomai, hou keil avilelau en sien.

¹³Buluk ka sipsip keil osomai avi houlu, ka kosakin ah osomai avilelau en anien. Tounah vasi koa moul alonge tahos ven amas onom, ka amusau masmasuk.