Sam 73:6-23

⁶Kuren la ding sigaara mi loklox aaso i ngan levenonga di vonga i at lengkaka atdi, la ding siga bok lemusak mi leesep i ngan lengkontamon babaalom di vitis korop di min.

⁷Lempatpeve atnedi ip kip soobang asu laxapmek, la levendoxoma atnedi ik lox angtang tinotno mi levendoxoma alipe xapmek.

⁸Ding longon aksaksa ri limixin la di paase mumu levempanga xapmek. Dik lox aaso la dik lox agagas li leventaangas kusu tik lox abaava lentaba vetpes.

⁹Di paase vupu ri ne Moroa mo ik lok toxun pana at laxalibet, la di paase asu avut lemet ti limixin at lavatbung menemen.

¹⁰Kuren la mo limixin at ne Moroa di repukus ti mu asu di la di nunu lolos tinotno at lempanga di paase i.

¹¹Mo limixin kapmek di tong i do, “Ne Moroa noxoklen i. Leeme Avolo noxo long terek nedik.”

¹²Limixin kapmek di paase kerepmo. Di ruuna laxampanga solo la move dirak lok ka panga bok.

¹³Kereva ba nenia, aga kok avukat gamasa mene lorooro rak, la agoxo lok laxapmek?

¹⁴O Moroa, uga lox asongot solo ia at laxanaleng axap. At leven maxantamak amisik ugap sev asongor ia.

¹⁵Do nia agita paase asu tevelinga vetpes kerekngan mo limixin kapmek, agitaba lox asuusu i do nenia xopmen lara atnedi limixin taram.

¹⁶Aga lok tong pen i do ana doxoma mumu na lumumuat, ketla ga lolos tinotno ria ri lox akmokso i,

¹⁷ga se at loxonaleng aga beles uto at loogu laplavang taram. Go ba i, aga long lenget ka ba i do lavanga salai mo naba vot atnedi limixin kapmek.

¹⁸Unaba lok li di ro at lenep i gagai, la unaba lok nedi diba subu tup at leeteke!

¹⁹Di naba pubeles soso mun at lesoxoreles. La laxavaxap atnedi, dinabap tava si rinotno uto xopok at loxot pis.

²⁰Dinabak lok ngan lapnobo i xap basinge lodoxoma at laradi at len maxantamak. La kerepmo bok at loxonaleng nenu, Leeme Silok, una beleku kaxat, dinaba sonao.

²¹At levenaleng levendoxoma rak ga soogong tu la labalak ga mamao ru.

²²Agang tangku ngan lavanga mi lavanuet kangkedek. A goxo xasep at lodoxoma ram.

²³Ketla nanga a nemen saparap amisix u, la um tebeng lakngak tino.